Maqtaaral aýdanyndaǵy sý basqan egistik alqaptardy qaita qalpyna keltirip, shitti maqta egý jumystary bastaldy. Osy maqsatta aýdanǵa Ózbekstan Respýblikasynyń Jyzaq jáne Syrdariia oblystarynan 40 arnaiy tehnika men 243,6 tonna maqta shiti jetkizildi, dep habarlaidy "Ult aqparat".
Kórshi elden kelgen tehnikanyń 15-i chizel agregaty bolsa, 11- júiekaralyq qopsytqysh jáne 14-i dán sepkish traktorlary. Osylaisha shekaraly aýdan aýmaǵyna jetkizilgen mamandar men tehnikalar qazirgi ýaqytta sýy tartylǵan eldi mekenderdegi sharýalarǵa kómektesip, maqta daqylyn qaita egip berip jatyr. Máselen, J.Nurlybaev aýyldyq okrýgine qarasty Qaraqyr eldi mekenindegi «Jamanqul» sharýa qojalyǵy ózbekstandyq tehnikanyń arqasynda 7 gektar alqabyna maqta shitin qaita seýip shyqty.
«Ózbekstandyq tehnikanyń kómegimen topan sý basqan 7 gektar alqabyma maqta dánin qaita seýip aldym. Kórshi aǵaiyndar tehnikadan bólek, janar-jaǵarmaiyn, surypty shitin de tegin berip otyr. Bul shyǵynǵa ushyraǵan biz sekildi diqandarǵa úlken kómek ekeni sózsiz», - deidi «Jamanqul» sharýa qojalyǵynyń múshesi Jandos Saparhan.
Aita keteiik, jalpy topan sýdan Maqtaaral aýdanyndaǵy 7 myń 500 gektar egistik alqap zardap shekken bolatyn. Sonyń 5035 gektary Jańajol aýyly okrýgine tiesili. Ózbekstandyq tehnikalardyń basym kópshiligi de osy aýyl okrýgine bólinip otyr. Budan bólek, Eńbekshi aýyldyq okrýgine qarasty Jańa turmys jáne Jantaqsai eldi mekeninderindegi jalpy aýmaǵy 113,31 gektar egistik alqapty qaita óńdeý jumystaryna da ózbekstandyq tehnikalar bólindi. Sonymen qatar, J.Nurlybaev aýyldyq okrýgine qarasty Qaraqyr eldi mekeninde 61,8 gektar egistikke qaitara maqta dánin sebý jumystary júrgizilýde.
«Kórshi memleketten kelgen tehnikalarǵa degen suranys kún sanap artyp otyr. Óitkeni sharýalar sý shaiǵan alqaptaryna mamyr aiynyń sońǵy kúnderine deiin maqta egýge bolatynyn jaqsy biledi. Sondyqtan olar kúndiz-túni tynbai egistik alqaptaryn qaita qalpyna keltirý jumystaryna jumylýda. Bir táýlikte shamamen 100 gektardan astam alqapqa kúlte júrgizilip, 100 gektarǵa maqta egilýde», - deidi aýdandyq aýyl sharýashylyǵy bóliminiń mamany Jarqynbek Myrzaliev.
