Maqtaaral aýdanyn jańbyr sýynan tazartý jumystary jalǵasýda. Bul maqsatta jeke quramnan 198 adam men 27 arnaiy tehnika jumyldyrylǵan, dep habarlaidy QazAqparat tilshisi.
Jergilikti memlekettik organdar men oblystyq, aýdandyq tótenshe jaǵdailar qyzmetine tiesili 63 birlik motopompa jáne jeke kásipkerler, aýdan turǵyndaryna tiesili 150-den astam sý sorý quraldary jańbyr sýyn syrtqa aǵyzyp jatyr.
Uzyndyǵy 12 shaqyrymǵa jýyq aryq-atyzdar qazylyp jáne tazalanyp, qazirgi jaǵdai boiynsha 58050 tekshe metr sý aýmaqtardan shyǵaryldy.
Qazirgi kezde aýdannyń iri kollektorlarynda sýdyń deńgeii aitarlyqtai túskeni baiqalady. Jeti kollektorda da sý deńgeii tómendegen.
Búgin aýdandyq tótenshe jaǵdailardyń aldyn alý jáne joiý jónindegi shtabtyń kezekti otyrysy ótti. Májiliske oblystyq tótenshe jaǵdailar departamentiniń bastyǵy, polkovnik Nurǵali Júnisov qatysty.
Jiyn barysynda bekitilgen keste boiynsha shtab músheleri ózderine tiesili jumystardyń barysy týraly baiandap, eldimekenderdegi ahýal týraly aityldy. Qazirgi tańda jaǵdai turaqtalǵan. Degenmen, aýdanǵa qarasty Maqtaaral aýyldyq okrýginiń keibir eldimekenderinde jaǵdai áli de kúrdeli. Osyǵan bailanysty aýdan basshysy tarapynan sý tartý, ony qashyrtý jumystaryn báseńsitpeý kerektigi aityldy.
Polkovnik N.Júnisov turǵyndarǵa túsindirý jumystaryn kúsheitý kerektigin aitty. Máselen, kentter men okrýgterge bólingen motopompalar arqyly eń birinshi kezekte áleýmettik jaǵdaiy tómen otbasylarǵa jáne úiine kirip-shyǵý múmkindigi joq turǵyndarǵa kómektesý kerektigin jetkizdi. Departament bastyǵy tik drenajdy uńǵymalardyń turaqty jumys isteýin qamtamasyz etý kerektigin aityp, sala mamandaryna tapsyrmalar berdi.
Aita keteiik, Maqtaaral aýdanynda naýryz aiynyń basynan beri tolassyz jaýǵan jańbyrdyń saldarynan birneshe eldimekenderde kósheler men úi aýlýlaryn sý basý jaǵdailary oryn alǵan bolatyn. Qazirgi tańda ahýal turaqtalǵanymen aýdandyq tótenshe jaǵdailardyń aldyn alý jáne joiý jónindegi shtab jumysyn jalǵastyra bermek.
