Maqsat Úsenov qamaýǵa alyndy. «Mister H6» atanǵan Úsenov «Almaty-Bangkok» reisinde buzaqylyq jasady dep aiyptalyp otyr, dep habarlaidy "Ult aqparat".
Bul týraly qalalyq sottyń baspasóz hatshysy Dias Mahambetov habarlady.
«Almaty qalasynyń ákimshilik sotyna Maqsat Úsenovke qatysty is tústi. Anyqtalǵandai, Almaty-Bangkok baǵytyndaǵy 931-reistiń oryndalýy barysynda Úsenov ushaq bortyndaǵy tártip erejelerin buzǵan. Sondai-aq oqiǵaǵa kýá bolǵandardyń sózine qaraǵanda, Úsenov beipil sóz aityp, ekipajdyń ushý qaýipsizdigine qatysty talaptaryn oryndaýdan bas tartqan jáne óz tártibimen jolaýshylarǵa yńǵaisyzdyq týǵyzǵan. Sot otyrysynda Úsenov kinásyn ishinara moiyndady. QR Ákimshilik kodeksiniń 334-baby 1-bóligi boiynsha kináli dep tanylǵan Maqsat Úsenovke qatysty sot úkimimen 10 táýlikke qamaýǵa alý túrindegi ákimshilik jaýapkershilikke tartyldy», - dep atap ótti Almaty qalalyq sotynyń baspasóz hatshysy Dias Mahambetov.
Sonymen qatar, búgin Almaty áýejaiy Ishki ister jelilik bóliminiń qyzmetkerleri Úsenovke qatysty QR ÁK-niń 566-baby boiynsha hattama toltyryp, oǵan 3 AEK kóleminde aiyppul saldy. Bul týraly QR Bas kólik prokýratýrasynyń baspasóz qyzmetinen habarlady.
Aita ketý kerek, Maqsat Úsenov 2013 jyly jeltoqsanda Almatyda birneshe adamdy kóligimen qaǵyp ótken bolatyn. Saldarynan bir adam qaza boldy. Taraptardyń ymyraǵa kelýine bailanysty Úsenov qamaýdan bosatylyp, oǵan Ákimshilik kodekstiń eki baby boiynsha jarty million teńge somasyna aiyppul ǵana salyndy. Osy oqiǵadan soń «Mister H6» atanǵan Úsenov jol erejesin birneshe ret qaita buzdy.
Jaqynda Maqsat Úsenov 160 myńǵa jýyq salyqtyq qaryzy bolsa da, Almatydan Bangkokke ushyp ketkeni habarlanǵan edi.
Keiin QR Ádilet ministrligi bereshegi bar azamattyń qalai shetel asqany týraly túsinikteme berdi.
Maqsat Úsenov 8 maýsymda 178000 teńge kólemindegi qaryzyn ótedi. Al keshe Almatyda ulttyq áýetasymaldaýshy kompaniianyń prezidenti Piter Fosterdiń tóraǵalyǵymen «Eir Astana» aviakompaniiasynyń Ushýlar qaýipsizdigi jónindegi komitetiniń otyrysy ótip, onda Maqsat Úsenovtiń Almaty-Bangkok ushaǵynyń bortyndaǵy buzaqy əreketi talqylandy. Nátijesinde Úsenov «Eir Astana» kompaniiasynyń «sur tizimine» engizildi.
