Óner qairatkerleri men áleýmettik jeli qoldanýshylary ánshi Maqpal Júnisovaǵa qoldaý bildirip, jazbalar arnady. Aita keteiik, ánshi Instagram paraqshasynda ómirden sharshaǵany týraly videolar jariialap, keiin óshirip tastaǵan. Jurt ony ishimdik ishken dep topshylady.
Alaida kópshilik qazaqtyń erke qyzyna bárin keshirýge bolady dep esepteidi.
Bloger Serik Hasenov Maqpal Júnisovany sógetinderge tańǵalatynyn jazdy. Aitýynsha, Maqpal siiaqty bola almaǵany úshin ómirge ókpeli adamdar ǵana ony sógedi.
"Maqpal Júnisovany ánshi emes degenderdiń qulaǵy kereń ne talǵamdarynda problema bar...
Maqpal hanymnyń ójettiligine rizamyn ózim. Ómirdiń nebir qiianaty men qyspaǵyna shydap kele jatyr... ómiri óz aýzymen aita almaityn ishinde ólip bara jatqan sumdyq pen shyndyǵy bar...
Ósek pen jala kimdi bolsyn qajytady... júregi názik áiel zatyna ol tipti aýyr tiip jatady...
Kúieýińdi atyp ketip, ólimin senen kóredi... Óner jolyńdaǵy esikter tars jabylady... Sulý, ónerli, qylyqty áieldiń qyryqta jesir qalý qasiretin aitýda qiyn... Basqan iziń ańdýly, bir aǵat adym jasasań búkil halyq nazaryndasyń...
Maqpal hanymnyń qyzyq pen qasiretke toly taǵdyrynyń bizge málim syrlarynyń ózi adamdy muńaitpai qoimaidy... al Maqpal hanymnyń ishinde ne bolyp jatqanyn aitpaq túgili, elestetý qiyn... bizge beimálim syrlary qanshama... aita alatyny bar, aita almaityny bar...
Bir adamnyń osynsha júkti arqalap alyp, taǵdyr jolynda moiynsunbai arpalysyp kele jatqanyn kórip basyńdy qalai ǵana imeisiń...
Ishipti deidi... nege ishpeýi kerek? Óz erki ǵoi... Maqpal hanym ishe túsińiz... sizge uzaq ǵumyr tileimin... sherińiz tarqasyn...
Ójet, qaisar, minezdi, názik, sulý, qylyqty Maqpal hanym... sizdiń ǵumyr úlken maidan! Sodan adamdyq qalybyńyzdy buzbai ustap kele jatqan erligińizdiń laiyqty baǵasyda bir kúni beriler... ónerińizdiń de, ózińizdiń de aldyńyzda basymdy idim!", - dep jazdy bloger.
Yqylas Ojaiuly esimdi Jeli qoldanýshysy Maqpal Júnisovadan qairatker, ia ibaly názik áiel beinesin kórgisi keletin adam ońbai qatelesedi deidi.
"Ol bar bolǵany kisi keipine ulasqan ánniń ózi ǵana. Onyń túieden túskendei sóilei salatyn, basy bar da aiaǵy joq orasholaq oiy – esken jeldei erke ánshiniń aqjeleń kóńili men ishki tabiǵatynyń nyshany.
Maqpal – ishki erkindik pen sana bostandyǵyna shyn kóterilgen adam. Onyń tik shapshyǵan baitaq daýysy men ár notany sorǵalatqan názik dirili sopynyń hal ishindegi beine bir dárgeii dersiń.
Maqpal syilaityn rýhani lázzat minájat pen katarsiske par. Ándi mátindik ám notalyq sheńberden shyǵaryp, mantra men ekstaz deńgeiine deiin jetkizgen mundai ónerpazdy buryn-sońdy esh jerden estigen emespin. Sol úshin de Maqpaldy qazaqqa bere salǵan Qudaiǵa myń madaǵymdy jaýdyramyn...", - dep jazdy ol.
Jazýshy Beibit Sarybai da Maqpal Júnisova aqtaýǵa zárý emes, Maqpal árdaiym óz biiginde, dep esepteidi.
"Maqpaldy shyr-pyr bolyp aqtap jatqandardy túsinemin. Maqpaldy aqtamańdar! Kimnen qorǵap álek bolyp jatyrsyńdar? Ol – Maqpal ǵoi. Bárimiz bilemiz, túsinemiz, jaqsy kóremiz. Tobyr deýge aýzym barmaidy, qoǵamda sondai bir sloi bar. Solar taratyp, jazyp jatqan shyǵar. Olarǵa keregi de sol. Shibóriler ǵoi. Talaǵandy jaqsy kóredi. Olarǵa biz senip qalmaimyz ǵoi. Kim ne dese de Maqpal óz biiginde, biz biletin biiginde qala bermek.
«Óle bersin kúnshilder kúiiginde,
Óz ǵasyrym ózimniń iinimde.
Aq jańbyrlar tozdyrǵan taý siiaqty,
Men ólemin ózimniń biigimde». Tólegen.
Maqpal sheńberden shyǵyp ketken adam. Muqaǵali Farizany eki iyǵynan ustap turyp: «sheńberden shyq»,-degen eken. Ony keiin kórnekti aqyn Israiyl Saparbai keremet óleń qylyp órdi. Oqyp kórińiz.
«Sheńberden shyq! –
Dúnie sheńberinen!
Jaraspaidy aqynǵa jerde júrgen.
Eki birdei aiaǵyn erbeńdetip,
Bosanbai ma bóbek te jórgeginen?!
Sheńberden shyq!
Sózimdi namys kórme.
Zapyran jutyp,
Qaitesiń zar ishkende?
Kindiginen bailanǵan Jer-anaǵa
Sheńberinen shyǵady Ǵaryshker de!
Sheńberden shyq! –
Shebinen órmekshiniń.
Kimge kerek shermende sherli óksigiń?
Men kóksegen kókte bir Qudiret bar,
Sol kieden ózińdi kórmekshimin.
Sheńberden shyq!
Tentek qyz, tekti qurbym!
Beiməlim bir əlemge betti burǵyn.
Ońashamen dos bolmai, kórmeimisiń,
Tamashamen taǵy da ótti bir kún.
Sheńberden shyq!
Shyǵyp ket shekten bylai!
Ədirem qalsyn óleńsiz ótken kún, ai!
Batyrlardyń dəý piri – Diiý bolsa,
Aqyndardyń əýpiri – Kók pen Qudai!
Sheńberden shyq!
Fariza, sheńberden shyq!
Serik izdep qaitesiń sergeldeńsip?
Túý biikke sharyqta!
Al sonan soń...
Eki kezdei tabarsyń jerden menshik...
Sheńberden shyq,
Fariza, sheńberden shyq!»
Oipyrmai uiat izdep otyrǵan álgilerdiń qylyǵynyń ózi uiatsyzdyq emes pe? Maqpal basqalarymyzdai ekijúzdi emes. Onyń bir ǵana beinesi bar. Ol eshqaiyssymyzdyń qolymyz jetpegen, kóksei beretin erkindikke shyqqan. Ol erkin adam. Eshkimge, eshteńege táýeldi emes. Maqpal imam ba edi, ustaz ba edi? Oibai, mama dep shoshityndai. Ol naǵyz shyǵarmashylyq adamy. Shyǵarmashylyq adamy sondai «tártipsiz» bolý kerek. Bir sózben aitqanda Maqpal naǵyz óner adamy. Óner adamy jaiynda Esenquldan asyryp kim ne jaza alǵandai:
Bizder, bizder patshadan da pańdarmyz,
Bizder, bizder bireýlerge armanbyz.
Bardy bar dep, joqty joq dep jasyrmai,
Baqytynan qashyp júrgen jandarmyz.
Bireýlerdiń oǵy joq bop atarǵa,
Bizder júrmiz qaterli bir saparda.
Jyrtyǵyńdy jamap berip jatsa da,
Eshkim bizdi qosa almaidy qatarǵa.
Aldymyzda jalt-jult etip ot shyraq,
Áne-mine baq qonardai bop turad.
Jalpy maqtap jany qalmai jatsa da,
Eshkim bizdi shyn túsingen joq, biraq.
Janymyzǵa bermei eshbir tynyshtyq,
Kópshilikpen kóp júrýge tyrystyq.
Bar ekenin mahabbattyń, shyndyqtyń,
Barsha adamǵa sendirýge tyrystyq.
Bizge ǵashyq uiatty qyz shybyq bel,
Bizge ǵashyq jany jaisań jigitter.
Biz júrgen jer úlbiregen úmitter,
Biz júrgen jer aq nietti búlikter.
Bárimiz sol jalpy maqtaýdan asa almaimyz. Eshkim ony shyn túsingen joq. Maqpal túsinińdershi dep te jatqan joq. Janyna tynyshtyq qoi, onyń", - dep jazdy Beibit Sarybai.
