Maqpal Júnisova kontsertinde án aityp, joralǵy suraǵan kókshetaýlyq ájeidiń nege qolyn qaitarǵanyn "El aýzynda" baǵdarlamasynda aityp berdi, dep jazady Sputnik agenttigi.
Maqpal hanymnyń aitýynsha, eldiń bárine syilyq taratyp bere beretindei jaǵdaiy joq.
"Oilanyp qaldym kádimgidei. Keshe, mysaly bir gaýhar tas júzigimdi sahnada turyp bireýge syilap jiberdim. Biraq óitip bárine taratyp bere beretindei mende bailyq joq qoi. Árine, yrym qyp alǵysy keldi, sondai jaqsy oidan týǵan shyǵar dep oilaimyn", - deidi ol.
Degenmen ánshi ájeidiń kóńilin qaldyrmaǵanyna bek senimdi. Al Qairat Nurtasty mysalǵa alýy, óziniń jaǵdaiyn úlken kisige túsindirý dep biledi eken.
"Kóbine bizde Qairat Nurtas kástómderin taratyp júredi. Óitkeni onyń tigin tsehy bar. 20 shaqtysyn tigip alyp, sodan gastrolge shyǵady da, shetinen taratyp bere beredi. Al mende ondai jaǵdai joq. Biraq, kórdińizder ǵoi, kitabymdy, diskimdi ol apaǵa týysqandarym ákelip berip jatty. Ol da bir syilyq dep oilaimyn", - deidi qazaqtyń erke qyzy.
Al bul kitapty basyp shyǵartý ánshige qymbatqa túsken eken.
"Bul - meniń alǵashqy kitabym. BAQ betterinde jariialanǵan barlyq suqbattarym jinastyrylyp berildi. Onda da qymbat qaǵazǵa. 15 myń dollarym ketti", - deidi ánshi.
Aita ketsek, Naýryz meiramynda Júnisovanyń Astanada ótken kontsertinde sahnaǵa shyqqan ájei ánshige "birdeńeńdi ber endi" dep qolqa salǵan. Buǵan bastapqyda sasyp qalǵan ánshi óziniń Qairat Nurtas emes ekenin aityp ázildeidi.
"...Bórkimdi sheship bere almaimyn. Men Qairat Nurtas emespin. Ol kisiniń áke-sheshesi bai, biznesteri bar. On shaqty kástóm tigip qoiady da shetinen sheship, taratyp bere beredi. Al mende ondai bai da, bailyq ta joq", - degen edi ol kezde kezde ánshi.
