Qazaqstan Respýblikasy Prezidenti Keńsesiniń Bastyǵy Mahmut Qasymbekov elimizdiń basty telearnalaryna suhbat berdi. Ol Memleket basshysynyń Qazaqstan halqyna arnalǵan Joldaýynda aitylǵan mindetterdi júzege asyrý úshin memlekettik organdardaǵy formalizm men biýrokratiiany joiý jóninde atqarylǵan jumystardyń nátijelerin baiandady. Sondai-aq, memlekettik apparattaǵy jinalystar sanyn azaitý jáne qujat ainalymyn qysqartý máselelerine egjei-tegjeili toqtaldy. Osyǵan bailanysty, suhbat mátinin oqyrmandar nazaryna usynamyz.
- Sońǵy kezde jinalystardyń kóptigi, sondai-aq memlekettik organdardaǵy qujat ainalymynyń áli de bolsa edáýir aýqymdylyǵyna qatysty máseleler keńinen sóz bolyp júr. Memleket basshysy halyqqa arnalǵan Joldaýynda osy ózekti taqyrypty kóterdi. Bul jaǵdaidy retke keltirý úshin qandai sharalar júzege asyrylyp jatyr?
- Esterińizde bolsa, el Prezidenti biylǵy qazan aiyndaǵy Qazaqstan halqyna arnalǵan Joldaýynda memlekettik organdardyń jumysynda formalizm men biýrokratiiaǵa áli de jol berilip otyrǵanyn atap ótti.
Bul rette, Elbasymyz jiyndar sanynyń negizsiz kóbeiip otyrǵanyna, qujat ainalymyn azaitýdyń baiaý ekenine nazar aýdardy.
Ol «mundai keleńsiz jaǵdaidy toqtatyp, bul máselelerdi retke keltirýdi» tapsyrdy.
Prezidenttiń osyndai másele kóterýi beker emes. Kóptegen ári uzaqqa sozylatyn jinalystar memlekettik qyzmetshilerdiń jumys rejiminiń únemi buzylýyna alyp keledi. Nátijesinde, bul jaǵdai olardyń eńbeginiń tiimdiligine jáne jalpy memlekettik apparattyń jumysyna keri áser etedi.
2017 jylǵy 25 tamyzda Elbasy «Qazaqstan Respýblikasy Prezidentiniń, onyń Ákimshiligi men Qazaqstan Respýblikasy Úkimetiniń Jumys reglamentin bekitý týraly» Ókimge qol qoiǵan bolatyn.
Qujatta mundai is-sharalardy ótkizýdiń formaty men ýaqytyna bailanysty búkil talaptar anyq jazylǵan.
Osyǵan bailanysty, Prezident Ákimshiligi barlyq deńgeidegi memlekettik organdarda túrli jiyndardyń sanyn qysqartý úshin júieli jumys júrgizýde.
Ótken jyldyń qyrkúieginen bastap memlekettik organdardyń osy talaptardy oryndaýyna qatysty jan-jaqty monitoring jasap kelemiz.
Sonyń arqasynda, ahýaldy qadaǵalap, qajet bolǵan jaǵdaida, memlekettik organdardyń basshylaryna jol bergen kemshilikteri týraly eskertip otyrýǵa múmkindigimiz bar.
Nursultan Ábishuly qazan aiyndaǵy Joldaýynda osyndai jaittardyń bar ekenine nazar aýdardy.
Memleket basshysynyń tapsyrmasy ýaqtyly ári ózekti ekendigin tájiribe kórsetip otyr. Sońǵy ailarda bul máselege bailanysty birqatar oń ózgerister baiqaldy.
Mysaly:
Memlekettik organdar jiyndardy belgilengen kúnderde ótkizý jónindegi reglament talaptaryn meilinshe qatań saqtaityn boldy. Máseleni osylaisha retteý otyrystar sanyn azaitýǵa yqpal etetini anyq.
Jinalystardyń jalpy sanynyń azaiýy baiqalyp otyr. 2017 jyldyń qyrkúiek-qarasha ailarynda 694 keńes ótkizilse, biyl osy ailarda 457 jiyn boldy. Demek, ótken jylmen salystyrǵanda, memlekettik organdar keńester sanyn 34 paiyzǵa azaitqan.
Birinshi basshylardyń qatysýymen ótetin otyrystar sany azaidy. Mysaly, 2017 jyly qyrkúiek-qarasha ailarynda ministrlerdiń qatysýymen 184 keńes ótkizilse, biyl osy merzimde 147 jiyn uiymdastyrylǵan. Iaǵni, 20 paiyzǵa azaidy. Ministrlerdiń kúndelikti jumysynyń kóptigin eskersek, bul da mańyzdy.
Memlekettik organdar selektorlyq jáne beine-konferentsiialyq bailanystyń múmkindikterin kóbirek paidalanatyn boldy. Máselen, búginde árbir besinshi keńes selektorlyq bailanys arqyly ótedi.
Sonymen, monitoring derekteri barlyq jinalystardyń jalpy uzaqtyǵy 40 paiyzǵa qysqarǵanyn kórsetip otyr.
Árine, men atap kórsetken oń ózgerister bárimizdi qýantady. Alaida, qol jetkizgen jetistikpen shektelip qalmaimyz.
Qazir biz barlyq memlekettik organdardyń aldyna jiyndardyń bárin keshki saǵat besten keshiktirmei ótkizý jóninde talap qoiyp otyrmyz. Osylaisha, memlekettik qyzmetshilerdiń jumys kúni alty jarymnan keshiktirilmei aiaqtalýyna múmkindik beremiz.
Shuǵyl áreket etýdi talap etetin jáne otyrystardy keiinge qaldyrýǵa bolmaityn erekshe jaǵdailarda ǵana basqasha bolýy múmkin.
Budan ózge ahýaldyń bárinde jinalystar jumys ýaqytynda ótkizilýge tiis.
Sonyń arqasynda memlekettik qyzmetshilerimiz 8 saǵattyq jumys kúninen soń bilimin jetildirýge, demalýǵa, otbasyna kóńil bólýge jáne sportpen shuǵyldanýǵa kóbirek ýaqyt jumsaityn jaǵdaiǵa birte-birte kelemiz.
Nátijesinde memlekettik qyzmetshilerdiń eńbek ónimdiligi artyp qana qoimai, olardyń tolyqqandy demalýyna da qolaily múmkindik týady.
Endi qujat ainalymyna keleiik.
Sońǵy jyldary memlekettik organdarda qujat ainalymyn azaitý úshin maqsatty jumystar júrgizilýde.
Máselen, biyl Prezident Ákimshiligindegi qujat ainalymynyń kólemi 2013 jylmen salystyrǵanda eki jarym ese qysqardy. Iaǵni, 625 myń qujattan 250 myń qujatqa deiin azaidy.
Osy merzim aralyǵynda ortalyq memlekettik organdarda jáne Astana, Almaty qalalary men oblystar ákimdikterindegi qujattardyń sany 30 paiyzdan astam kórsetkishke, iaǵni 4,9 millionnan 3,3 millionǵa deiin azaidy.
Mundai nátijege júieli sharalar qabyldaýdyń arqasynda qol jetkizildi. Mysaly, ortalyq memlekettik organdarda:
kóptegen qujat túrleri jáne olardy Prezident Ákimshiligine engizýdiń merzimdik tártibi ońtailandyryldy;
tómengi uiymdarǵa kózdelmegen suranymdar joldaýǵa tyiym salyndy;
Basshylyqtyń tapsyrmalaryna baqylaý júrgizýdiń tártibi qaita qaraldy.
Memlekettik bilik tarmaqtary arasyndaǵy ókilettikterdi qaita bólý máseleleri boiynsha Konstitýtsiialyq zańdarǵa, sondai-aq, Memleket basshysynyń, sonyń ishinde onyń biylǵy qazan aiyndaǵy Qazaqstan halqyna arnalǵan Joldaýynda berilgen tapsyrmalaryna sáikes, kóptegen qujattarǵa baqylaý júrgizý ortalyq jáne jergilikti atqarýshy organdardyń quzyryna berildi.
Osy jumystardyń nátijesinde, Prezident Ákimshiliginiń baqylaýyndaǵy qujattar sany 40 paiyzǵa azaidy.
Biz tapsyrmalarǵa baqylaý jasaýdan qazaqstandyqtardyń ál-aýqatyn jaqsartýǵa baǵyttalǵan reformalar men baǵdarlamalar nátijelerin baqylaýǵa kóshýdi kózdep otyrmyz.
Qujat ainalymyn qysqartýmen qatar, ony elektrondy-tsifrlyq formatqa kóshirý jónindegi jumystar da belsendi júrgizilýde.
Qazir «Tsifrlyq Qazaqstan» memlekettik baǵdarlamasy aiasynda memlekettik organdardy Elektrondyq qujat ainalymynyń biryńǵai júiesine kóshirý júzege asyrylýda. Azamattardyń ótinishterin qaraýdyń elektrondy júiesi engizilýde. Barlyq memlekettik organdar úshin biryńǵai elektrondy qujattar arhivi jasaqtalýda.
Osylaisha, biz qolǵa alynǵan istiń naqty nátijesin kórip otyrmyz. Bul jumys aldaǵy ýaqytta da jalǵasady. Biz Memleket basshysynyń Qazaqstan halqyna arnalǵan Joldaýynda berilgen tiisti tapsyrmalardyń tolyq jáne sózsiz oryndalýyna qol jetkizetin bolamyz.
.jpeg)