Qazaqstan musylmandary dini basqarmasy (QMDB) nekeniń shariǵattaǵy negizgi sharttaryn túsindirip, eki taraptyń ózara kelisimi neke qiiýdyń basty talaby ekenin málimdedi, dep habarlaidy ult.kz.
QMDB málimetinshe, eki jaqtyń razylyǵy bolmasa, neke zańsyz ári durys bolyp eseptelmeidi. Sonymen qatar, neke qiiý kezinde úilenýshi taraptardyń usynysy men kelisimi anyq aitylyp, bir ýaqytta jáne bir jerde jariia etilýi qajet.
Dini basqarma nekeniń birneshe negizgi sharty bar ekenin atap ótti. Atap aitqanda, qyzdyń ata-anasynyń nemese shariǵi qamqorshysynyń ruqsaty bolýy, neke qiiý rásimine talapqa sai kýágerlerdiń qatysýy, qalyńdyqqa beriletin máhrdiń belgilenýi jáne nekege kedergi keltiretin týystyq nemese dini sebepterdiń bolmaýy mindetti.
"Máhr – er adamnyń neke qiylý barysynda qalyńdyqqa óz rizashylyǵymen beretin shariǵi syiy. Hanafi mázhabynda máhrdiń eń tómengi shegi 10 dirham. Sahabalar ómir súrgen zamanda 10 dirham bir altyn dinarǵa teń bolǵan. Bul qazirgi ólshemmen 4,25 gramm altyn nemese soǵan teń keletin aqshalai qarajatqa (naryqtaǵy qunyna) sáikes keledi. Máhrdiń mólsherin er azamattyń materialdyq múmkindigine qarap, otbasynyń áleýmettik jaǵdaiyn eskere otyryp aitqan jón. Óitkeni máhr kúieý jigitti qaryzǵa batyratyndai kóp nemese qyzdyń kóńilin qaldyratyndai az bolmaýy kerek. Máhrdi birden berýge shamasy jetpese, onyń bir bóligin aldyn ala (máhr mýǵajjál) berip, qalǵanyn keiin (máhr mýájjál) berýi", - delingen QMDB málimdemesinde.
Sondai-aq dini basqarma halqymyz mundai talaptar saqtalǵan nekeni «adal neke» nemese «aq neke» dep ataǵanyn eske saldy.
Buǵan qosa, QMDB sońǵy jyldary qoǵamda «azamattyq neke» ataýymen eshqandai zańdyq nemese shariǵi rásimsiz birge turýdyń kóbeiip kele jatqanyna nazar aýdardy. Dini basqarmanyń málimdeýinshe, mundai ýaqytsha qatynastar islam dininde de, qazaqtyń ulttyq dástúrinde de quptalmaidy.
