Elimizde magistratýra jáne doktorantýraǵa oqýǵa túsý erejeleri ózgerdi. Bul týraly Bilim jáne ǵylym vitse-ministri Ashat Aimaǵambetov habarlady.
«Birinshiden, magistratýraǵa granttar kelesi jyldan bastap úmitkerlerdiń biryńǵai emtihanynyń qorytyndysy boiynsha bólinetin bolady. Eger osyǵan deiin magistratýraǵa granttar JOO berilgen bolsa, jáne olar ózderi tapsyrma daiyndaǵan, ózderi emtihan ótkizip, tústý týraly sheshimdi ózderi qabyldaǵan bolǵan, endi GMAT formaty boiynsha biryńǵai emtihan bolady. Iaǵni úmitkerlerge Ulttyq testileý ortalyǵy ótkizetin keshendik testileýden ótý kerek» deidi vitse-ministr.
Onyń aitýynsha, osy testileýdiń nátijesi boiynsha bilim berý baǵdarlamalary turǵysynda jinalǵan balldar boiynsha saralaý júrgizilip, joǵary ball jinaǵan talapkerler grant alady, sáikesinshe erikti túrde ózi JOO tańdaityn bolady.
«Osylaisha, «grant magistranttyń sońynan eredi» degen qaǵida júzege asyrylady. Bul JOO basekelestigin artýy tiis jáne sózsiz granttardyń ashyq jáne ádil taratylýyna septigin tigizedi. Magistratýraǵa túsýshilerge daiyndyq baǵytynyń sheńberindegi naqty bilim berý baǵdarlamalarynyń tobyn kórsetý qajet. Úmitkerler shet tilin tapsyrady (osyǵan deiin de solai bolǵan), sondai-aq bilim alýǵa daiyndyǵa boiynsha jáne 2 salalyq pánder boiynsha testiler tapsyrady», deidi Ashat Aimaǵambetov.
Sondai-aq doktorantýraǵa túsý erejesi de ózgerýine qatysty tyń aqparattar aityldy.
Vitse-ministrdiń habarlaýynsha, oqýǵa túsýshi doktorantýranyń salalyq páni boiynsha qai JOO-na tússe, sol jerde, sol ýniversitette emtihan tapsyrady, sonymen qatar shet tilin biletinin rastaityn sertifikat usynady.
«Mundaǵy basty ózgeris – endi doktorantýraǵa túsý úshin halyqaralyq sertifikat (sáikesinshe, IELTS, TOEFL jáne t.b.) talap etiletininde. Shet tili boiynsha testileý doktorantýra boiynsha endi Ulttyq testileý ortalyǵy arqyly ótkizilmeidi. Sondyqtan doktorantýraǵa túsemin dep niet bildirýshiler osy baǵyt boiynsha daiyndalýlary tiis», deidi ol óz jazbasynda.
