Atom energiiasy jónindegi halyqaralyq agenttigi (MAGATE) aqpan aiynda Belarýstiń Ostrovets qalasyna baryp, energetika infraqurylymynyń atom elektr stantsiiasyn iske qosý boiynsha daiyndyǵyn tekseredi. Belarýstiń energetika ministri MAGATE missiiasy 24 aqpanda jumysyn bastaitynyn habarlady.
Belarýs prezidenti Aleksandr Lýkashenko 2008 jyly atom elektr stantsiiasyn salý týraly qujatqa qol qoiǵan. Lýkashenko jańa atom elektr stantsiiasy eldi Reseige degen energetikalyq táýeldilikten qutqarady dep úmittenedi (Belarýs gazdyń 90 paiyzyn Reseiden alady). Alaida Ostrovetstegi elektr stantsiiasyn reseilik kompaniialar salyp jatyr, qarjynyń jartysyn Máskeý quiyp otyr. Boljam boiynsha, AES qurylysyna 5-ten 22 milliard dollarǵa deiin qarjy jumsalmaq.
Buǵan deiin qurylys alańynda birneshe "tótenshe oqiǵa" bolǵan. 2016 jyly shilde aiynda 330 tonnalyq reaktr shanaǵyn bekitý kezinde 2-4 metr biiktikten qulap túsken. Eki aptadan astam ýaqyt ótkennen keiin ǵana Belarýstiń energetika ministri "tótenshe jaǵdai" bolǵanyn rastady.
AES salynyp jatqan Ostrovetsten 50 kilometr ǵana jerde turǵan Litva 2008 jyldan beri qurylys jobasyna alańdap keledi. 2011 jyly Fýkýsimadaǵy apattan keiin MAGATE atom elektr stantsiialary iri eldi mekenderden keminde 100 shaqyrym alys ornalasýy kerek degen talap qoiǵan. Vilniýs Minsk bul sharttardy oryndamai otyr dep sanaidy.
Belarýs sheneýnikteriniń aitýynsha, alǵashqy energoblok - 2020 jyly, ekinshisi - 2021 jyly iske qosylýy tiis. Stantsiia jylyna 18 milliard kilovatt/saǵ elektr energiiasyn óndiredi.
