Tsifrlyq damý, qorǵanys jáne aeroǵarysh ónerkásibi vitse-ministri Abylaihan Ospanov Májilis tóraǵasy Nurlan Nyǵmatýlinnen sóz estidi, dep habarlaidy Sputnik Qazaqstan tilshisi.
Búgin májilistiń jalpy otyrysynda birinshi oqylymda memlekettik qyzmetter kórsetý máseleleri boiynsha zań jobasy qaraldy.
Suraq-jaýap barysynda tsifrlyq damý, qorǵanys jáne aeroǵarysh ónerkásibi vitse-ministri Abylaihan Ospanovtyń depýtattardyń aqparattyq júielerdi kiriktirýge qatysty qoiǵan saýalyna bergen jaýaby Nyǵmatýlinniń kóńilinen shyqpady.
"Siz bul qyzmetke jaqynda kiristińiz be? Qaidan keldińiz?", - dep surady spiker.
"Azamattarǵa arnalǵan úkimet" memlekettik korporatsiiasynan", - dep jaýap berdi Ospanov.
"Men mádeniet ministrliginen kelgen shyǵar dep oilasam. Sairap tursyń, jai. Naqty suraqqa naqty jaýap kerek. Sizdiń ministrlik memlekettik organdardyń barlyq júiesin kiriktirýge jaýapty. Búginde qai organdy alyp qarasań da, aqparattyq júielerdi kiriktirýde problemalar bar. Sonyń saldarynan, máselen, jalpyǵa birdei deklaratsiia siiaqty mańyzdy sharalardy keiinge qaldyrýǵa májbúr bolyp otyrmyz.
"E-halyq" júiesi de istemeidi, aqaýlar bar, qarjy ministrliginiń kedendik júiesi de máz emes. Ainalaiyn, Abylaihan Esenuly, aityp bershi bizge? Ne bolyp jatyr ózi? Memleketten qyrýar aqsha bólindi, nátije qaida?", - dep surady Májilis spikeri.
"Siz durys aitasyz" dei bergen Ospanovqa "tyńda, maǵan baǵa berýdiń qajeti joq, suraqqa jaýap berińiz",- dep ursyp tastady Nyǵmatýlin.
Ospanov biyl "Smart Bridge" atty jańa joba júzege asyrylǵaly jatqanyn aitty.
"Taǵy bir joba! Oǵan taǵy da memleket aqsha bólýi kerek. Memleket osy aqparattyq júielerge qanshama aqsha jumsady. Nege endi olar jumys istemeidi? Nege kiriktirilmegen?", - dep ashýlandy Májilis tóraǵasy.
Vitse-ministr máseleni jyl sońyna deiin sheshýge ýáde berdi.
"Halyq ashynyp otyr. Biz deklaratsiia jasap, bizde osyndai júie bar dep jar salamyz. Olar kelip, ony qoldana almaidy. Qazir 21 ǵasyr. Eger kenshige osy jospardy orynda dep norma berse, ol ony oryndaidy. Oryndasama, onyń sebebin suraidy. Al sizderden nege suraý joq? Memleketten qanshama aqsha bólinip otyr, biraq aqparattyq júieler kiriktirilmegen. Eshteńe jumys istemeidi. Qazir júrgizýshi kýáligin eshqaida barmai-aq, qashyqtan alýdy uiymdastyrý kerek. IIM daiyn, derekter bazasy bar. Biraq, adamdar sol burynǵysynsha tańerteń erte turyp, kezekke turady", - dep ashyndy Nyǵmatýlin.
"Túzeimiz", - dep qysqa qaiyrdy Ospanov.
"Túzetińder. Jalpy, meniń oiymsha, úkimettiń saǵattarynyń birin dál osy máselege arnaý kerek. Osy ministrlik kelip, esep bersin. Áitpese, bizde bes jyl boiy keiinge shegerilip kele jatqan júieler bar. Bes jyl buryn iske qosylýy tiis bolsa da, áli josparda júr. Tártip ornatyńdar", - dep tapsyrdy Nyǵmatýlin.
Aita ketsek, Abylaihan Ospanov osy jyldyń 6 sáýirinde tsifrlyq damý, qorǵanys jáne aeroǵarysh ónerkásibi vitse-ministri bolyp taǵaiyndaldy. Buǵan deiin ol "Azamattarǵa arnalǵan úkimet" memlekettik korporatsiiasyn basqarǵan edi.
