QR Eńbek jáne halyqty áleýmettik qorǵaý ministri Mádina Ábilqasymova azamattardy jumysqa ornalastyrý úshin bólingen qarajattyń talan-tarajǵa salynýyna qatysty pikir bildirdi, dep habarlaidy QazAqparat tilshisi.
«Búgin Bas prokýratýra ótken jyldardaǵy baǵdarlamaǵa júrgizilgen tekserý nátijesin jariia etti. Baǵdarlamany júzege asyrý barysynda kei jerlerde aitarlyqtai buzýshylyqtar oryn alǵan. Jumysqa ornalastyrý nemese qysqa merzimdi kásibi oqytý týraly jalǵan anyqtamalar anyqtaldy. Atalǵan sharalarǵa 5 mlrd teńge bólinip, 70 myńnan astam adam oqytylǵan. Al jumysqa ornalasqany shamamen 60 paiyz ǵana», - dedi ministr Májilistegi parlamenttik tyńdaýdan keiin BAQ ókilderine.
Onyń atap ótýinshe, kinálilerge qatysty sharalar qabyldanǵan.
«Degenmen, baǵdarlamany júzege asyrý eń aldymen jergilikti atqarýshy organdardyń quziretine kiredi. Buzýshylyqtar oryn alǵan Halyqty jumyspen qamtý ortalyqtary qazirgi ýaqytta jergilikti atqarýshy organdardyń baqylaýynda. Árbir fakti boiynsha ákimdiktermen jáne jumyspen qamtý basqarmalarymen mán-jaidy anyqtadyq. Sharalar qabyldanyp, mundai buzýshylyqtar jibergen qyzmetkerler jumystan shyǵaryldy», - dedi Mádina Ábilqasymova.
Sonymen qatar ol ministrlik oryn alǵan buzýshylyqtardyń sáikesinshe qorytyndy shyǵarǵanyn basa aitty.
«Baǵdarlama sharttary jaqsardy. Bul jaiynda búgin aittym. Oqý oryndaryn irikteý talaptary jaqsartyldy. Materialdyq bazasy jaqsy, ótken jyldardaǵy jumysqa ornalastyrý kórsetkishi 60 paiyzdan kem emes oqý oryndary ǵana bul baǵdarlamaǵa qosylatyn bolady. Qazirgi ýaqytta atalǵan oqý oryndarynyń tizimi «Atameken» UKP-men bekitiledi. Sodan keiin óńirlik komissiiaǵa shyǵarylyp bekitiledi jáne oqý oryndaryn irikteý júrgziledi. Biz talaptardy qatańdatyp, atalǵan tizilimdi qaita qaraimyz», - dedi ministr.
Aita keteiik, buǵan deiin QR Bas prokýratýrasy halyqty jumyspen qamtý baǵdarlamasy aiasynda bólingen qarajattyń tiimsiz paidalanǵandyǵyn jáne urlanǵanyn jariia etken bolatyn.
