Qazaqstanda Memleket basshysy Qasym-Jomart Toqaevtyń bastamasymen mádeni infraqurylymdy damytý jáne mádeniet mekemeleriniń qyzmetin kópshilikke keńinen usyný baǵytyndaǵy jumystar turaqty túrde júzege asyrylady.
Búginde elimizde 7 445 mádeniet uiymy bar. Bul salada 56 myńnan astam maman jumys isteidi. Memleket jańa mádeniet nysandaryn salýǵa, qoldanystaǵy mekemelerdi jańǵyrtýǵa jáne olardyń materialdyq-tehnikalyq áleýetin nyǵaitýǵa júieli túrde kóńil bólip keledi.
Keiingi bes jylda elimizde 274 mádeniet nysany paidalanýǵa berilip, taǵy 1 293 nysanǵa jóndeý jumystary júrgizildi. Al 2026 jyly 64 nysannyń qurylysy jalǵasyp, taǵy 130 nysan jańartylyp jatyr.
Teatr ónerin damytý – saladaǵy negizgi basymdyqtyń biri. Keiingi jyldary Astana, Túrkistan jáne Petropavl qalalarynda jańa teatr ǵimarattary salyndy. Qazir Aqtóbe men Qonaev qalalarynda drama teatrlarynyń qurylysy jalǵasyp jatyr. Sonymen qatar Shymkent, Qyzylorda jáne Semei qalalarynda jańa teatrlar salý josparlanǵan. Buǵan qosa Muhtar Áýezov atyndaǵy Qazaq ulttyq drama teatry men Nataliia Sats atyndaǵy orys memlekettik akademiialyq balalar men jasóspirimder teatry ǵimarattaryn jańǵyrtý jumystary júrgizilip jatyr.
Mýzei salasynda da birqatar joba qolǵa alyndy. 2025 jyly Astanada jańa Óner mýzeii ashyldy. Túrkistan jáne Almaty oblystarynda «Saýran», «Gaýhar ana» jáne «Esik» vizit-ortalyqtarynyń qurylysy jalǵasyp jatyr. Sonymen qatar kóne Bozoq qalashyǵynyń negizinde ashyq aspan astyndaǵy ulttyq park qurý jobasy júzege asyrylyp jatyr.
Ábilhan Qasteev atyndaǵy ulttyq óner mýzeii, Almatydaǵy Ortalyq memlekettik mýzei jáne Abai atyndaǵy Qazaq ulttyq opera jáne balet teatry jańartyldy. Mundai jobalar tarihi-mádeni murany saqtaýǵa qolaily jaǵdai jasap qana qoimai, kórme jáne sahna jumystarynyń sapasyn arttyrýǵa da múmkindik beredi.
Saladaǵy basty baǵyttardyń biri – mádeniet úilerin damytý. Bul maqsatta «Qazaqstan halqyna» qoǵamdyq qorymen birlesip, óńirlerdegi mádeniet oshaqtarynyń materialdyq-tehnikalyq bazasyn nyǵaitý jumystary júrgizilip jatyr.
Mádeni infraqurylymdy damytý bilikti mamandar daiarlaý isimen de tyǵyz bailanysty. Osy baǵytta Almaty qalasynda shyǵarmashylyq baǵyttaǵy oqý oryndary stýdentterine arnalǵan 500 oryndyq jataqhananyń qurylysy bastaldy. Aleksandr Seleznev atyndaǵy Almaty horeografiialyq ýchilishesiniń ǵimaraty jańǵyrtylyp jatyr. Budan bólek Almaty men Astanadaǵy úsh mamandandyrylǵan mýzyka mektebine arnalǵan jańa ǵimarattar salý máselesi pysyqtalady.
Memleket basshysynyń tapsyrmasyna sáikes, Shymkent qalasynda jańa Mádeniet jáne óner ýniversitetin qurý jumystary qolǵa alyndy. Jańa oqý ornynda mádeniet salasyndaǵy zamanaýi jáne tehnikalyq mamandyqtardy damytýǵa basymdyq berilmek.
Sonymen qatar Petropavl qalasynda Kúlásh Baiseiitova atyndaǵy Qazaq ulttyq óner ýniversitetiniń filialyn ashý jobasy júzege asyrylyp keledi. Bul bastamalar sapaly bilimge jol ashyp, mádeniet salasynyń kadrlyq áleýetin nyǵaitýǵa múmkindik beredi.
