Elordada mádeniet, óner salasynyń uiymdary men qyzmetkerleri arasyndaǵy IV respýblikalyq «Rýhani qazyna – 2021» festivali bastaldy, dep habarlaidy "Ult aqparat".
Mádeniet jáne óner salasy qyzmetkerleriniń kásibi merekesine orai uiymdastyrylǵan festivaldiń respýblikalyq deńgeidegi qazylar alqasynyń otyrysy 12-14 mamyr aralyǵynda onlin kórsetilim arqyly júredi.
Festivaldiń saltanatty marapattaý rásimi 18-21 mamyr aralyǵyna josparlanyp otyr. Osy aralyqta Kókshetaý qalasynda sheteldik sarapshylardyń qatysýymen sheberlik saǵattary ótedi.
Festivaldiń ashylý saltanatyna Mədeniet jəne sport ministrliginiń atynan qatysqan mədeniet jəne óner isteri departamentiniń direktory Kúmis Seiitova jyl ótken saiyn jumysyn respýblika deńgeiinde kórsetkisi keletin uiym men qyzmetkerler sany artyp kele jatqanyn atap ótti.
«Búginde baiqaýǵa elimizdiń 15 óńirinen kitaphana, mýzei jáne mádeni-demalys qyzmeti boiynsha 300-den astam ótinish kelip tústi. Al eń alǵash uiymdastyrǵan kezde qatysýshylar sany 100-ge jetpeitin edi. Jyl ótken saiyn aýyl, aýdan, qaladaǵy mədeniet oshaqtarynyń qyzmetin jandandyrýǵa baǵyttalǵan baiqaý keńinen tanylyp keledi. Osy festivalde úzdik shyqqan uiym 1 mln teńge, top jarǵan qyzmetker 500 myń teńge syiaqy alady. Biyl festivaldiń mamyr aiynda ótkizilýiniń ózindik sebebi bar. Úzdikterdi marapattaý rásimi bastalatyn 18 mamyr – halyqaralyq mýzei kúnine, 21 – mamyr elimizdiń mədeniet jáne óner salasy qyzmetkerleriniń kúnine orailastyryldy», - dedi Kúmis Seiitova.
Respýblikalyq «Rýhani qazyna – 2021» baiqaýynyń aiasynda oblystyq, aýdandyq, qalalyq deńgeidegi úzdik memlekettik mýzei, úzdik kitaphana, úzdik memlekettik mádeni oiyn-saýyq uiymy men mádeniet uiymdarynyń úzdik qyzmetkerleri iriktelip, marapattalady.
