2021 jyldyń 14 sáýirinde top músheleriniń biri M. zańsyz jasalǵan mefedrondy alyp, Almatydaǵy kóshelerdiń birine jasyrǵan. Sol kúni jasyrylǵan zattar tabylyp, ony politsiia tárkiledi.
"20 sáýirde kottedjdiń jertólesin tintý kezinde asa iri kólemdegi psihotroptyq zattar men ony daiyndaýǵa arnalǵan qurylǵylar men komponentter tabyldy. Odan bólek, M. turatyn úide tastyń astynan mefedron shyqty", - dedi sotta.
Sotta prokýror tergeýdiń aiyptaýyn qoldap, qylmystyq toptyń jetekshisi H.-ny 18 jylǵa, al qalǵan qatysýshylardy 17-den 17,5 jylǵa deiin bas bostandyǵynan aiyrý jazasyn taǵaiyndady.
"Sot úkimimen H. qylmystyq topty quryp, basshylyq etip, psihtroptyq zattardyń zańsyz analogyn daiyndap, saqtaǵany úshin kináli dep tanylyp, 17 jylǵa bas bostandyǵynan aiyryldy.
Toptyń qalǵan músheleri psihtroptyq zattardyń zańsyz analogyn daiyndap, saqtaǵany úshin, qylmystyq top múshesi bolǵany úshin kináli dep tanyldy. Úsheýi 16 jylǵa bas bostandyǵynan aiyryldy, qalǵany 15 jyl 3 ai merzimge qamaldy", - dedi sotta.
Jazany jeńildetý úshin qylmyskerlerdiń jasy, buryn isti bolmaǵany eskerildi. Odan bólek, kúdikti S. kinásin moiyndaǵany úshin jaza jeńildetildi.
Úkim áli zańdy kúshine engen joq.
Eske salaiyq, byltyr 21 mamyrda qazaqstandyq tanymal Mad Men tobynyń múshelerine uiymdasqan qylmystyq top qurdy jáne oǵan qatysty degen aiyp taǵylǵan bolatyn. Politsiia málimeti boiynsha, turaqty esirtki jelisi bir ai buryn joiylǵan. Onyń quramynda 21 jastan 30 jasqa deiingi 10 adam bolǵan. Topty 27 jastaǵy H. basqarady.
Iske qatysy bar kúdiktilerge QR QK-nyń 262-baby 1 jáne 2-bóliginde kózdelgen UQT qurý jáne oǵan basshylyq etý deregi boiynsha aiyp taǵylǵan. Kúdiktiler sot sanktsiiasymen qamaýǵa alynǵan edi.
