Argentinada 41 jastaǵy avtomehanik Alberto Federiko Araos Aresenanyń ólimine qatysty tergeý júrip jatyr. Onyń denesi óz úiinen tabylǵan. Marqumnyń denesinde keminde 20 pyshaq jaraqaty bolǵan, basyna paket kigizilgen, dep habarlaidy ult.kz.
Clarín basylymynyń málimetinshe, oqiǵa Moreno mýnitsipalitetine qarasty La-Reha qalasynda bolǵan. Politsiia marqumnyń áieli Elizabet Kasteliano men 23 jastaǵy qyzy Florensiiadan jaýap alǵan. Keiin eki áiel de kúdikti retinde ustaldy.
Áielderdiń aitýynsha, er adam uzaq ýaqyt boiy olarǵa fizikalyq kúsh kórsetip, psihologiialyq qysym jasaǵan. Oqiǵa bolǵan kúni otbasynda janjal týyndaǵan. Tergeýdiń aldyn ala nusqasy boiynsha, áielderdiń biri er adamnyń moinyna pyshaq suǵyp, ekinshisi basyna paket kigizgen. Marqumnyń ólimine keńirdeginiń zaqymdanýy sebep bolǵan degen boljam bar.
Kúdiktiler prokýrorǵa jaýap berýden bas tartqan. Qazir tergeýshiler otbasyndaǵy turmystyq zorlyq-zombylyqqa qatysty derekterdi de tekserip jatyr. Politsiia men sot bazalarynda marqumǵa qatysty buryn aryz tirkelmegen. Alaida basqa bir basylymnyń habarlaýynsha, eki áieldiń denesinen ártúrli ýaqytta paida bolǵan bolýy múmkin kógergen izder anyqtalǵan.
Kórshilerdiń sózinshe, otbasylyq úiden jii aiqai-shý estiletin.
