Belarýste narazylyq sharalary jalǵasyp jatqan shaqta Aleksandr Lýkashenko ant berip, Prezident qyzmetine kiristi. Inaýgýratsiia rásiminiń bolatynyn kóp adam bilmegen. Onyń ótetini jaily aldyn ala habarlanbady. Memlekettik "Belta" agenttiginiń jazýynsha, "saltanatty rásim" 23 qyrkúiekte Táýelsizdik saraiynda ótken.
Zań boiynsha, prezidenttiń ant berý sharasynan respýblikalyq telearnalar men radiolardan transliatsiia jasalýy kerek. Biraq jergilikti telearnalardan ant berý rásimi kórsetilmegen.
Memlekettik agenttikterdiń habarlaýynsha, Lýkashenko inaýgýratsiiasyna júzdegen adam shaqyrylǵan. Olardyń arasynda joǵary laýazymdy tulǵalar, depýtattar, respýblika keńesiniń músheleri, memlekettik organ basshylary, jergilikti atqarý organ ókilderi, aqparat quraldary, ǵylym, mádeniet, sport qairatkerleri bar.
Lýkashenko belarýs tilinde ant bergen. Budan soń ant bergeni jaily aktige qol qoiyp, ortalyq sailaý komissiiasynyń tóraiymy Lidiia Ermoshina oǵan Belarýs respýblikasy prezidentiniń kýáligin tapsyrǵan.
"Nastoiashee vremia" arnasynyń habarlaýynsha, sársenbi kúni tańerteńnen bastap Minsk turǵyndary Táýelsizdik saraiy aldynda áskeri tehnika men sarbazdar turǵanyn kórgen. Inaýgratsiia jaily sybys shyqsa da saiasatkerler ony joqqa shyǵarǵan.
Elde 9 tamyzdan beri narazylyq sharalary jalǵasyp keledi. Narazylar prezident sailaýynyń qorytyndysy burmalandy dep esepteidi. Olar Lýkashenko otstavkaǵa ketip, elde jańadan ádil sailaýy ótýi tiis deidi.
66 jastaǵy Belarýs basshysy narazylyqqa shyqqandardy kúshpen basyp, kóptegen azamattar qamaý oryndarynda azaptaýǵa ushyraǵanyn aitqan.
Buǵan deiin oppozitsiia jetekshisi Svetlana Tihanovskaia inaýgýratsiia ótkizý zańsyz bolady dep málimdegen.
