Belarýs Prezidenti Aleksandr Lýkashenko reseilik "Drýjba" qubyr jelisi arqyly kelgen sapasyz munaidan eldiń "orasan zor" zardap shekkenin aityp, Reseiden ótemaqy kútetinin jetkizdi.
"Bul - munai qubyr jelisi, munai qubyryndaǵy jabdyqtardyń ózine jáne munai óńdeý zaýytyna kelgen orasan zor shyǵyn. Bul elge kelgen orasan zor zalal. Biz kiristiń belgili bir bóligin ala almadyq, valiýtalyq túsim, tranzit - kóp aqshadan airyldyq" dedi 11 mamyrda jýrnalister suraqtaryna jaýap bergen Aleksandr Lýkashenko. Onyń sózinen BelTA aqparat agenttigi úzindi keltirdi.
Onyń boljamynsha, zalal kólemi júzdegen million dollar bolýy múmkin jáne Resei munymen daýlaspaidy dep úmittenetinin de jetkizdi.
Belarýs jaǵy reseilik munaidyń sapasynyń nasharlaǵanyn eń alǵash ret 19 sáýirde málimdegen. "Belneftehim" kompaniiasynyń dereginshe, reseilik munaidyń quramyndaǵy hlorid mólsheri jiyrma eseden asqan. Sáýir aiynyń sońynda Resei "Drýjba" qubyr jelisi arqyly baratyn munaidy toqtatty.
"Drýjba" qubyr jelisi Resei men Qazaqstannan keletin munaidy Belarýs arqyly Polsha, Germaniia jáne Slovakiiaǵa jetkizedi.
