Aleksandr Lýkashenko Qyrym "zań júzinde" ári "is júzinde" Reseidiń territoriiasy dep málimdedi. Onyń aitýynsha, Lýkashenko Resei prezidenti Vladimir Pýtinmen birge túbekti kórip qaitýǵa kelisken jáne bul saparyn Sevastopolden bastaýǵa nietti, dep jazady Azattyq.
Halyqaralyq quqyq boiynsha, Resei 2014 jyly Qyrymdy Ýkrainadan anneksiialap alǵan.
Álemdegi kóp eldiń basshylyǵy Belarýstiń zańdy sailanǵan prezidenti dep sanamaityn Aleksandr Lýkashenko "Qyrym referendýmnan keiin de-iýre Reseidiń jerine ainaldy" dedi. Onyń bul sózin Belarýstiń BelTA agenttigi jariialady. Bul málimdeme resmi túrde bekitile me, ol týraly aitylmaidy.
2014 jyly naýryzda Qyrymda jedel túrde referendým ótkizilip, onda turǵyndardyń kópshiligi Qyrymdy Reseige qosýdy jaqtaǵan. Halyqaralyq uiymdar men álem memleketteri bul referendým nátijesin moiyndaýdan bas tartqan.
2021 jyldyń tamyzynda Lýkashenko "reseilik sońǵy oligarh" túbekke ónim tasymaldai bastaǵanda Qyrymdy Reseidiki dep tanitynyn aitqan. Halyqaralyq sanktsiialardan qoryqqan Reseidiń federaldyq kompaniialary anneksiialaǵan aimaqta áli kúnge biznes júrgizbei keledi.
Onyń aldynda Lýkashenko sanktsiialardan qoryqqannan jáne Ýkrainanyń burynǵy prezidenti Petr Poroshenkomen ýaǵda bolǵandyqtan, Qyrymdy Reseidiki dep moiyndaýdan tartynatynyn aitqan edi.
Ýkrainanyń jańa prezidenti Vladimir Zelenskii Belarýste byltyr tamyzda ótken prezident sailaýynyń nátijesin moiyndaýdan bas tartqannan keiin Minsk pen Kiev arasy kúrt nasharlady, al Kiev Batystyń Minskige qarsy sanktsiialaryna qosyldy.
Belarýs oppozitsiiasy da, Batys elderi de Lýkashenko altynshy merzimge sailandy degen sailaý nátijesin moiyndaýdan bas tartty. Olar daýys berý barysyn táýelsiz baqylai otyryp, jańa sailaý ótkizýge shaqyrdy.
Sailaýdan keiin elde jappai narazylyq bastaldy. Lýkashenko rejimi ondaǵan myń adam qatysqan demonstratsiialardy kúshpen basyp tastady. Myńdaǵan adam qamalyp, saiasi belsendilerge, aqparat quraldaryna qysym kúsheidi. Saiasi oppozitsiia ókilderiniń birazy shetelge ketse, endi birazy túrli sebeptermen túrmege qamaldy.
