Prezident Aleksandr Lýkashenko Belarýs Ýkrainadaǵy "arnaiy áskeri operatsiiaǵa" qatysyp jatqanyn rastady, - dep habarlaidy Massaget.kz portaly BELTA agenttigine silteme jasap.
"Ýkrainadaǵy arnaiy áskeri operatsiiaǵa qatysýymyzǵa keletin bolsaq, oǵan qatysamyz. Muny jasyrmaimyz. Biraq eshkimdi óltirmeimiz. Óz áskerimizdi eshqaida jibermeimiz. Óz mindettemelerimizdi buzbaimyz", - dedi ol áskeri qaýipsizdik máseleleri jónindegi keńeste.
Onyń aitýynsha, eldiń bul operatsiiaǵa qatysý sebebi - qaqtyǵystyń Belarýs aýmaǵyna taralýyna jol bermeý.
"Ekinshiden, Polsha, Litva jáne Latviia tarapynan arnaiy áskeri operatsiia degen jeleýmen Belarýske soqqy jasaýǵa jol bermeý. Jańa aitqanymdai, Belarýs aýmaǵynan reseilikterge eshkim oq atpaidy. Mine, qatysý degenim - osy.
Iá, emdep jatyrmyz. Qajet bolsa, adamdardy emdedik. Iá, adamdardy tamaqtandyryp jatyrmyz. Tek reseilikterdi ǵana emes. Bosqyndardy, kedeilerdi, kúnine Ýkrainadan keletin 400-500 adamdy tamaqtandyramyz. Olardy qalai tamaqtandyrmaimyz, olardy qalai emdemeimiz? Bul - bizdiń osy áskeri operatsiiaǵa qatysýymyz. Basqasha bolmaidy", - dedi Lýkashenko.
Belarýs prezidenti Ýkraina Belarýs shekarasyna 15 myńǵa deiin áskeri qyzmetshi tobyn tartyp, baqylaý-ótkizý pýnktteri men atys pozitsiialaryn injenerlik qural-jabdyqtarmen qamtamasyz etip, jol tosqaýyldaryn ornatqanyn aitty.
"Bir sózben aitqanda, tosqaýyl qoiyp qana qoimai, qabyrǵa turǵyzyldy. Únemi bizdiń aýmaqqa, áskerge, nysandarǵa optikalyq, radioelektrondyq, radiotehnikalyq barlaý júrgiziledi. Ushqyshsyz basqarylatyn ushaqtarymen memlekettik shekara syzyǵy jii buzylady. Sonymen qatar, "Belarýs soǵysqa qatyspasa bolar edi" dep ýaiymdap, úreilenedi", - dedi Aleksandr Lýkashenko.
Sonymen qatar, Lýkashenko Belarýske mobilizatsiia jariialaýdyń qajeti joǵyn, biraq reseilik tájiribeni eskerip, áskeri qyzmetke jaýaptylardy tirkeý jáne soǵan sáikes qosymsha jaýyngerlerdi daiyndaý jumystaryn uiymdastyrý qajet ekenin aitty.
