Memleket basshysy Belarýs Prezidenti Aleksandr Lýkashenkomen kezdesti, dep habarlaidy "Ult aqparat" Aqordanyń resmi saityna silteme jasap.
Qasym-Jomart Toqaev AÓSShK pen TMD sammitterine qatysqany úshin Aleksandr Lýkashenkoǵa alǵys aitty. Sonymen qatar Qazaqstannyń Belarýspen aradaǵy strategiialyq seriktestikti jan-jaqty damytýǵa basa mán beretinin atap ótti.
Áńgimelesý barysynda prezidentter eki el arasyndaǵy kópjosparly yntymaqtastyqtyń qazirgi jaǵdaiy men qarym-qatynastardy odan ári nyǵaitý perspektivalaryn talqylady. Saýda-ekonomikalyq ózara is-áreket pen óndiristik kooperatsiiany jan-jaqty jandandyrýǵa erekshe nazar aýdaryldy.
- Men Úkimet múshelerine saýda-sattyqty, investitsiialyq yntymaqtastyqty arttyryp, jobalardy ilgeriletý úshin barlyq múmkindikti jasaý qajet dep únemi aityp otyramyn. Qolda bar áleýetti paidalaný qajet. Meniń tarapymnan tiimdi kópjaqty yntymaqtastyqty odan ári damytý úshin barlyq sharalar qabyldanady, – dedi Qasym-Jomart Toqaev.
Aleksandr Lýkashenko sammitke shaqyrǵany úshin Memleket basshysyna alǵys aityp, AÓSShK-ti odan ári nyǵaitýdyń áleýeti mol ekenin atap ótti.
– AÓSShK uiymyn jahandyq deńgeide damyta bastaǵanyńyz óte durys, – dedi Belarýs Prezidenti.
Sonymen qatar memleketter basshylary halyqaralyq jáne aimaqtyq kún tártibi týraly pikir almasty.
