Lufthansa nemis áýe kompaniiasynyń qyzmetkerleri jalaqy daýyna qatysty 27 shildede ereýilge shyqpaqshy. Bul jazǵy kezeńde áýe kompaniia jolaýshylary úshin qiyndyq týdyrary sózsiz, dep habarlaidy QazAqparat agenttigi.
Eýropalyq BAQ málimetinshe, Ver.di2 kásipodaǵyna múshe áýe kompaniianyń 20 myń qyzmetkeri sársenbi 03:45-ten (27 shilde) beisenbi saǵat 6-ǵa deiin (28 shilde) ereýilge shyǵady.
Kásipodaq osy aptadaǵy ereýil Frankfýrt, Diýsseldorf, Keln, Gambýrg, Miýnhen jáne Berlin qalalaryndaǵy áýejailardy qosa alǵanda, barlyq Lufthansa bazalarynda ótetinin, saldarynan «reister toqtaitynyn jáne keshigetinin» rastady.
Ver.di kásipodaǵy óz músheleriniń jalaqysyn 9,5% arttyrýdy talap etip otyr jáne tamyz aiynda Lufthansa basshylyǵymen kelissózder aldynda «eskertý ereýilin» ótkizbekshi.
«Germaniia áýejaiyndaǵy jaǵdai qyzmetkerler úshin de, jolaýshylar úshin de birneshe kúnnen beri qiyn bolyp jatyr. Biraq jolaýshylardyń uzaq kútetinine, reisterdiń toqtatylyp nemese keiinge shegerilip jatqanyna, júkterdiń joǵalyp jatqanyna qyzmetkerler kináli emes», - delingen kásipodaq málimdemesinde.
Lufthansa áýe kompaniiasy bir kúndik ereýildi «negizsiz» dep atap, jolaýshylar úshin «bos áýreshilik» ekenin málimdedi.
«Kelissózder ótkennen keiingi ekinshi kúni Ver.di2 ereýil týraly málimdedi. Onyń barlyq jerde ótetinine jáne uzaqtyǵyna qarap, eskertý sipatyndaǵy ereýil bolady dep aitýǵa kelmeidi», - dedi Lufthansa kompaniiasynyń personal jónindegi direktory Maikl Niggemann.
