Ulybritaniiada qazaqtyń uly aqyny Abai shyǵarmalarynyń aǵylshyn tilindegi jańa jinaǵynyń onlain tusaýkeseri ótti, dep habarlaidy "Ult aqparat".
Kitaptyń basty ereksheligi uly oishyl eńbekteriniń qazaq tilinen tikelei, túpnusqaǵa barynsha jaqyn aýdarylýynda. Buǵan deiin Abaidyń óleńderi men qara sózderi orysshadan tárjimalanǵan bolatyn.
Jobany Ulttyq aýdarma biýrosy jáne álemge áigili Kembridj ýniversitetiniń baspasy Abaidyń 175 jyldyǵy qarsańynda jáne «Rýhani jańǵyrý» baǵdarlamasy aiasynda júzege asyryp otyr. Tusaýkeser Britaniialyq ulttyq kitaphanada ótedi dep josparlanǵan bolatyn. Biraq Angliiada ekinshi jalpyulttyq lokdaýnnyń jariialanýyna bailanysty onlain formatta uiymdastyryldy. Abai eńbekteri buǵan deiin Keńes ideologiiasyna sáikes, ishinara ǵana jáne orys tilinen tárjimalanyp kelgen bolatyn. Endi ol barynsha tolyq jáne óz mánin joǵaltpaǵan erekshe jinaq retinde tarihta qalmaq.
QR Mádeniet jáne sport ministri Aqtoty Raiymqulovanyń aitýynsha, aǵylshyn tili - milliardtan astam adamnyń ortaq tili. Abaidyń tolyq shyǵarmalar jinaǵynyń aǵylshyn tiline aýdarylýy - aqyn shyǵarmalary milliard oqyrmanǵa usynyldy degen sóz.
Ulttyq aýdarma biýrosy tárjima isine britaniialyq tájiribeli aýdarmashylardy tartqan. Sońǵylary qazaqshadan týra aýdarylǵan mátindi aǵylshynnyń ádebi tilinde sóiletken. Aýdarmashylar aldymen uly aqynnyń shyǵarmashylyǵyn tereń zerttep, onyń tuńǵiyǵyna boilaǵandaryn aitady.
Britaniialyq tanymal aýdarmashy ári aqyn Shon O’Braienniń paiymdaýynsha, Abai óleńderine aǵylshyn tilinde jan bitirý ońaiǵa túspegen. «Aýdarmanyń sátti shyǵýy úshin kásibi kúsh-jigerimdi aiamadym. Áýezdiligin, mánin tolyq jetkize bilý, sóilem qurylymyn saqtaý, dramatizmdi ustaný, bári-bári men úshin óte mańyzdy boldy», - deidi O’Braien.
Kembridj ýniversiteti baspasynyń basshysy Piter Fillips: «Bul jobany júzege asyra otyryp, qazaqstandyq seriktesterimizben birge jahandyq aýditoriiaǵa qazaqtyń bai murasyn jetkizemiz degen úmittemiz. Jinaqqa aqynnyń 145 óleńi, 3 poemasy jáne Qara sózderi engizilgen», dedi.
Bul kommertsiialyq joba emes jáne paida tabýdy kózdemeidi. Ázirge shekteýli tirajben shyǵarylatyn kitaptar Qazaqstannyń Ulybritaniiadaǵy elshiliginiń yqpal etýimen jergilikti ýniversitetter men kitaphanalarǵa taratylatyn bolady. Budan bólek ony onlain da oqý múmkin bolmaq.
