Halyqaralyq qaýymdastyq moiyndaǵan Liviianyń ulttyq kelisim úkimeti reseilik ''Vagner" jeke áskeri tobynyń sarbazdaryn Tripolide himiialyq qarý qoldandy dep aiyptady. Bul aqparatty Al-Araby Al-Jadeed basylymy jazdy. Liviianyń ishki ister ministri Fathi Bashagidiń aitýynsha, general Halif Haftar jaǵynda soǵysyp jatqan reseilik jaldamalylar Tripolidiń ońtústigindegi Salah ad-Din aýdanynda júikeni jansyzdandyratyn gaz qoldanǵan.
Ministrdiń aitýynsha, úkimet kúshteriniń birneshe sarbazyna snaiper atylǵannan keiin júikeleri jansyzdanǵan. Bashaga mundai nárse "Vagner" tobynan basqa eshkimniń qolynan kelmeidi dep sanaidy. Al-Araby Al-Jadeed maqalada oqiǵanyń qashan bolǵanyn jazbaǵan.
Jaqynda egipettik jýrnalist Amrý Salahýddin Twitter-de Haftar áskeri Salah ad-Dinge bomba tastaǵannan keiin jerge qulaǵan birneshe sarbazdyń qalshyldap tynys ala almai qalǵanyn jazǵan. Buǵan deiin eki jaqta soǵysyp jatqan ushqyshtardyń bir bóligi ózge elden kelgen jaldamalylar ekeni habarlanǵan edi.
Liviiadaǵy azamattyq soǵys 2011 jyldan beri jalǵasyp keledi. Mýammar Kaddafi rejimi qulaǵan soń eldegi fraktsiialar bilikke talasyp jatyr. Haftardyń kúshi eldiń shyǵysyn, BUU moiyndaǵan Saradj úkimeti el astanasy Tripoli men onyń mańaiyn ustap otyr.
Saradj biligin Túrkiia qoldap, buǵan deiin Liviiaǵa ásker jibergen. Haftardy Egipet pen BAÁ qoldaidy. Haftarǵa Reseiden kelgen jaldamaly áskerler de kómektesip jatyr degen aqparat taraǵan. Biraq muny Máskeý joqqa shyǵaryp, eki tarapty da qoldamaitynyn málimdedi.
Intelligence online saitynyń jazýynsha, Haftar áskeri sovettik qarý-jaraqtardy paidalanady. Saittyń habarlaýynsha, mysaly, Sý-27 ushaǵyn Máskeýdiń maquldaýynsyz satyp alý múmkin emes.
Haftar áskeri 2019 jyly sáýir aiynda Tripolige shabýyl jasap, alaida qalany ala almaǵan.
Resei biligi "Vagner" jeke áskeri tobynyń baryn joqqa shyǵarady.
