Litvanyń ekinshi iri qalasy bolyp tabylatyn – Kaýnas qalasynda Qazaqstan Respýblikasynyń Qurmetti konsýly keńsesiniń ashylýy ótti. Bul týraly "Ult aqparat" Elshilikke silteme jasap habarlaidy.
Saltanatty is-sharaǵa Kaýnas jáne Kaýnas ýeziniń, Litva SIM basshylary men diplomatiialyq korpýs músheleri, Litvanyń iri joǵary oqý oryndarynyń rektorlary, qalanyń iskerlik, akademiialyq jáne shyǵarmashylyq toptarynyń ókilderi qatysty.
Rásimdi ashqan QR Litvadaǵy Elshisi V.Temirbaev Kaýnastyń bizdiń elmen keń jáne kóp qyrly bailanystaryn nazarǵa ala otyryp, dál osy qalada Qazaqstannyń Qurmetti konsýldyǵy ashylatynyn atap ótti. Qazaqstandyq diplomattyń pikirinshe, bul qadam Qazaqstan-Litva yntymaqtastyǵynyń kún tártibine jańa serpin men jańa ideialardy engizedi, eki el arasyndaǵy óńiraralyq bailanystardy keńeitýge yqpal etetin bolady.
QR Kaýnastaǵy qurmetti konsýly, burynǵy okrýgtik sýdia, belgili advokat jáne professor Albertas Milinis konsýldyqtyń jumysy ekijaqty saýda-ekonomikalyq, mádeni jáne gýmanitarlyq bailanystardy keńeitýge, biznes, týrizm jáne bilim berý salalarynda ózara almasýdy jolǵa qoiýǵa baǵyttalatynyn atap ótti. Óz qalasynyń jurtshylyǵy atynan, Qazaqstan basshylyǵy men halqyna tarih qoinaýynan tamyr jaiǵan dostyq pen áriptestik úshin alǵys aitty.
Osy is-shara sheńberinde Kaýnas saýda-ónerkásip palatasy músheleriniń qatysýymen biznes-forým ótti, onyń barysynda Prezidentimizdiń «Jańa jaǵdaidaǵy Qazaqstan: is-qimyl kezeńi» Joldaýynyń negizgi erejeleri talqylandy, sondai-aq elimizdiń biregei tabiǵaty týraly «Beimálim Qazaqstan» fotokórmesi uiymdastyryldy.
Qazaqstan Respýblikasynyń qurmetti konsýldyǵy Kaýnastyń qaq ortasynda – «VLC» biznes-ortalyǵynda óz esigin Kaýnas tehnologiialyq ýniversiteti, Uly Vitovt Ýniversiteti jáne Litva densaýlyq týraly ǵylymdar ýniversiteti siiaqty Litvanyń iri joǵary oqý oryndarynyń qorshaýynda ashty.
Jyl saiyn munda oq ýǵa 100-den astam qazaqstandyq stýdentter keledi. Kaýnas mamandary Qazaqstanda kardiohirýrgiia jáne perinataldyq meditsina siiaqty salalardyń qalyptasýyna aitarlyqtai úles qosýda. Álemniń úzdik kardiohirýrgtarynyń biri Rimantas Benetis Astana men Almatyda júrekke kúrdeli otalardy júieli túrde júrgizip keledi.
Litva arqyly ótetin negizgi kólik magistraldarynyń túiisken jerinde Kaýnas Litvanyń eń iri ónerkásiptik ortalyǵy bolyp tabylady. Dál osy jerde «Continental» jáne «Hellas» siiaqty brendterdiń zaýyttary ashyldy.
Kaýnas pen Qazaqstandy da sporttyq dástúrler bailanystyrady. «Qazaq kúresi» Eýropa Federatsiiasy Kaýnasta tirkelgen. Óz kezeginde, belgili Kaýnas jattyqtyrýshylary bizdiń elimizde basketboldy damytýǵa kómektesedi, sonyń ishinde litvalyq ataqty basketbolshy Arvidas Sabonis.
2022 jyly Kaýnas Eýropanyń mádeni astanasy bolady.
