Litsenziiasynan aiyrylǵan joǵary oqý oryndarynyń stýdentteri semestrdiń aiaqtalýyn kútpei-aq basqa ýniversitetterge aýysa alady. Bul týraly Bilim jáne ǵylym ministrliginen málim boldy, dep habarlaidy "Ult aqparat".
«Joǵary oqý oryndarynyń jabylýy men stýdentterdi basqa oqý oryndaryna ýaqytyly aýystyrý qajettiligine bailanysty ministrlik normativtik qujattarǵa ózgerister engizdi. Endi JOO bilim berý qyzmetimen ainalysý litsenziiasynan nemese litsenziiaǵa qosymshadan aiyrylǵan, sondai-aq joǵary oqý orny jabylǵan jaǵdaida atalǵan oqý ornynyń stýdentteri semestrdiń aiaqtalýyn kútpesten birden basqa JOO-ǵa aýysa alady. Bul norma oqýlaryn jalǵastyrý barysynda stýdentterge qoldaý kórsetýge baǵyttalǵan», - delingen vedomstvo málimetinde.
Qazir ministrlikte bilim berý uiymdary qyzmetiniń úlgilik qaǵidalaryna litsenziiasy toqtatylǵan JOO bilim alýshylaryn aýystyrý bóliginde qosymsha ózgerister engizý boiynsha joǵary oqý oryndarynan túsip jatqan birqatar usynys qarastyrylyp jatyr. Aldaǵy ýaqytta mundai jaǵdailar oryn alsa, stýdentter litsenziianyń yqtimal keri qaitarylýyn kútpei-aq basqa JOO-ǵa aýysa alady.
«Joǵaryda kórsetilgen usynystar múddeli uiymdarmen kelisý boiynsha tiisti rásimderden ótedi. Ministrlik jabylatyn joǵary oqý oryndarynyń stýdentterin basqa JOO-ǵa aýystyrýdy qamtamasyz etedi. Bul rette stýdentterdi qabyldaityn joǵary oqý oryndarynyń oqý qunyn kótermeýi boiynsha máseleler sheshiletin bolady», - dep atap ótilgen habarlamada.
