Foto: videodan skrinshot
Bala quqyqtary jónindegi ýákil Dinara Zakieva Astanada liftte balalarǵa shabýyl jasaǵan psihikalyq aýytqýy bar jasóspirim týraly tyń derekter jariialady, dep habarlaidy Ult.kz.
Dinara Zakieva balalarǵa shabýyl jasaǵan jasóspirimniń qazir qaida ekenin aitty. Ol aýdan ákimimen birge aýrýhanada jatqan balanyń ákesimen kezdesip, sóilesken.
"Balanyń jaǵdaiy turaqty, barlyq qajetti kómek kórsetilip jatyr. Sondai-aq Astana qalasy boiynsha aimaqtyq komissar Bimendina A.T. qyzdyń anasymen únemi bailanysta. Shabýyl jasaǵan bala jaǵdaiyna bailanysty tergeý bitkenshe densaýlyq saqtaý mekemesinde bolady", – dedi bala quqyqtary jónindegi ýákil.
Jasóspirimniń anasy jaýapqa tartyldy. Qazir tergeý jumystary júrgizilip jatyr. Dinara Zakievanyń aitýynsha, jasóspirim arnaiy bólimniń baqylaýynda.
"Astana qalasynyń Mamandandyrylǵan aýdanaralyq tergeý sotynyń 2025 jylǵy 12 aqpandaǵy qaýlysyna sáikes 2010 jylǵy 7 tamyzda týǵan kámeletke tolmaǵan jasóspirim 1 ai merzimge psihiatriialyq statsionarǵa jatqyzyldy. Naýqas úshin kúsheitilgen baqylaý rejimi belgilendi", – dep málimdedi Astana qalsy densaýlyq saqtaý basqarmasy.
Bala quqyqtary jónindegi ýákildiń aitýynsha, sot sheshimine sáikes qylmys jasaǵan psihikalyq aýytqýy bar adamdar májbúrli túrde emdeletin mekemede qazir 745 adam jatyr. Onyń bireýi 2025 jyly kelip túsken kámeletke tolmaǵan qyz bala ekenin atap ótti. Al byltyr eshqandai naýqas kelip túspegen.
"2024 jyly kámeletke tolmaǵandar barlyǵy 1890 qylmystyq quqyq buzýshylyq jasady. Onyń 130-y asa aýyr. Sondai-aq kámeletke tolmaǵandar jáne olardyń qatysýymen 12 kisi óltirý faktisi tirkeldi. Bulai stigmatizatsiia jasap, qylmys pen esepte turǵan kámeletke tolmaǵandardy bailanystyrýǵa jol berýge bolmaidy", – deidi Zakieva.
