Liftide qaza bolǵan Aizat Ábdisamattyń otbasy 40 kúndik sadaqasynan soń málimdeme jasady. Otbasy kináli adamdardyń jazalanýyn talap etti, dep habarlaidy QazAqparat tilshisi.
Aqtóbe qalasyndaǵy 12 yqsham aýdanynda bir aidan astam ýaqyt buryn qaiǵyly oqiǵa tirkeldi. Nebári 28 jastaǵy jýrnalist Aizat Ábdisamat úsh jastaǵy qyzymen liftige minip, sol jerde mert boldy. Buǵan deiin habarlaǵanymyzdai, jas kelinshekti kúieýi lifti ishinde qystyrylyp turǵan jerinen alyp shyqqan. Sol jerde balasy da boldy.
Al bir aidan soń Aqtóbe oblystyq energetika jáne turǵyn úi-kommýnaldyq sharýashylyq basqarmasy liftiniń avtomatikasy isten shyqqanyn tekserý kezinde anyqtady. Lift mamandarynyń qorytyndysy ishki ister organdaryna berilgen.
Mán-jaidy bilip otyrǵan Aizat Ábdisamattyń otbasy kinálilerdiń jazalanýyn talap etti.
«Qyzymnyń qazasy kúieý balama da aýyr tidi. Olar uiqydan aiyryldy. Kishkentai qyzy anasyn kóp izdemeidi. Bala bolsa da mamasynyń endi kelmesin sezedi. Sýretin kórgende ǵana «Aizat, Aizat» dep eleńdeidi. Keiin «meniń mamam liftige qysylyp qaldy, mamam «pomogite» dep aiqailady» dep qaitalaidy. Balada qorqynysh bar. Kólik ishinde otyrǵanda da «qolyńnan ustap otyraiyn, qulap qalmashy» dep janyndaǵy adamnyń qolynan aiyrylmaidy. Arada 40 kún ótti. Biz sadaqany ótkizip, liftterdi tekserý aiaqtalǵanyn bilip otyrmyz. Barlyq aiǵaq bar, lifttiń isten shyqqany belgili, biraq is sotqa jeter emes. Kináli adamdardyń jazalanǵanyn talap etemiz», - dedi Aizat Ábdisamattyń anasy Aisha Tólemisova.
Qaza bolǵan jas kelinshektiń otbasy liftige qyzmet kórsetetin «Jánibek servis» PIK jaýapqa tartylýy tiis dep esepteidi.
«Turǵyndar liftiniń jii toqtap qalyp, ishinde qamalǵanyn aityp jatyr. Baýyrym kóz jumdy. Biraq biz mundai qaiǵyly oqiǵanyń qaitalanbaýyn qalap, liftke jaýapty kompaniianyń jaýapqa tartylýyn suraimyz. Páter ieleri kooperativiniń ókili kelgen kezde «onyń ajaly» dep aityp ketti. Jylap otyrǵanda osy sóz janymyzǵa batty. 4 jyl boiy sol liftige minip júrgen Aizattyń qaýipsizdikti saqtamaýy múmkin emes», - Aizat Ábdisamattyń apasy Gúljainar Qarasholaqova.
Aita keteiik, liftidegi qaiǵyly oqiǵaǵa bailanysty «Sapasyz salynǵan qurylys» baby boiynsha tergeý júrip jatyr. Birneshe saraptama taǵaiyndaldy.
Jas kelinshek qaza bolǵan lift esigi sol kúii ashyq tur. Turǵyndar esik aldyna aǵash qoiǵan.
