ليفتٸدە قازا بولعان ايزات ەبدٸساماتتىڭ وتباسى 40 كٷندٸك ساداقاسىنان سوڭ مەلٸمدەمە جاسادى. وتباسى كٸنەلٸ ادامداردىڭ جازالانۋىن تالاپ ەتتٸ, دەپ حابارلايدى قازاقپارات تٸلشٸسٸ.
اقتٶبە قالاسىنداعى 12 ىقشام اۋدانىندا بٸر ايدان استام ۋاقىت بۇرىن قايعىلى وقيعا تٸركەلدٸ. نەبەرٸ 28 جاستاعى جۋرناليست ايزات ەبدٸسامات ٷش جاستاعى قىزىمەن ليفتٸگە مٸنٸپ, سول جەردە مەرت بولدى. بۇعان دەيٸن حابارلاعانىمىزداي, جاس كەلٸنشەكتٸ كٷيەۋٸ ليفتٸ ٸشٸندە قىستىرىلىپ تۇرعان جەرٸنەن الىپ شىققان. سول جەردە بالاسى دا بولدى.
ال بٸر ايدان سوڭ اقتٶبە وبلىستىق ەنەرگەتيكا جەنە تۇرعىن ٷي-كوممۋنالدىق شارۋاشىلىق باسقارماسى ليفتٸنٸڭ اۆتوماتيكاسى ٸستەن شىققانىن تەكسەرۋ كەزٸندە انىقتادى. ليفت ماماندارىنىڭ قورىتىندىسى ٸشكٸ ٸستەر ورگاندارىنا بەرٸلگەن.
مەن-جايدى بٸلٸپ وتىرعان ايزات ەبدٸساماتتىڭ وتباسى كٸنەلٸلەردٸڭ جازالانۋىن تالاپ ەتتٸ.
«قىزىمنىڭ قازاسى كٷيەۋ بالاما دا اۋىر تيدٸ. ولار ۇيقىدان ايىرىلدى. كٸشكەنتاي قىزى اناسىن كٶپ ٸزدەمەيدٸ. بالا بولسا دا ماماسىنىڭ ەندٸ كەلمەسٸن سەزەدٸ. سۋرەتٸن كٶرگەندە عانا «ايزات, ايزات» دەپ ەلەڭدەيدٸ. كەيٸن «مەنٸڭ مامام ليفتٸگە قىسىلىپ قالدى, مامام «پوموگيتە» دەپ ايقايلادى» دەپ قايتالايدى. بالادا قورقىنىش بار. كٶلٸك ٸشٸندە وتىرعاندا دا «قولىڭنان ۇستاپ وتىرايىن, قۇلاپ قالماشى» دەپ جانىنداعى ادامنىڭ قولىنان ايىرىلمايدى. ارادا 40 كٷن ٶتتٸ. بٸز ساداقانى ٶتكٸزٸپ, ليفتتەردٸ تەكسەرۋ اياقتالعانىن بٸلٸپ وتىرمىز. بارلىق ايعاق بار, ليفتتٸڭ ٸستەن شىققانى بەلگٸلٸ, بٸراق ٸس سوتقا جەتەر ەمەس. كٸنەلٸ ادامداردىڭ جازالانعانىن تالاپ ەتەمٸز», - دەدٸ ايزات ەبدٸساماتتىڭ اناسى ايشا تٶلەمٸسوۆا.
قازا بولعان جاس كەلٸنشەكتٸڭ وتباسى ليفتٸگە قىزمەت كٶرسەتەتٸن «جەنٸبەك سەرۆيس» پيك جاۋاپقا تارتىلۋى تيٸس دەپ ەسەپتەيدٸ.
«تۇرعىندار ليفتٸنٸڭ جيٸ توقتاپ قالىپ, ٸشٸندە قامالعانىن ايتىپ جاتىر. باۋىرىم كٶز جۇمدى. بٸراق بٸز مۇنداي قايعىلى وقيعانىڭ قايتالانباۋىن قالاپ, ليفتكە جاۋاپتى كومپانييانىڭ جاۋاپقا تارتىلۋىن سۇرايمىز. پەتەر يەلەرٸ كووپەراتيۆٸنٸڭ ٶكٸلٸ كەلگەن كەزدە «ونىڭ اجالى» دەپ ايتىپ كەتتٸ. جىلاپ وتىرعاندا وسى سٶز جانىمىزعا باتتى. 4 جىل بويى سول ليفتٸگە مٸنٸپ جٷرگەن ايزاتتىڭ قاۋٸپسٸزدٸكتٸ ساقتاماۋى مٷمكٸن ەمەس», - ايزات ەبدٸساماتتىڭ اپاسى گٷلجاينار قاراشولاقوۆا.
ايتا كەتەيٸك, ليفتٸدەگٸ قايعىلى وقيعاعا بايلانىستى «ساپاسىز سالىنعان قۇرىلىس» بابى بويىنشا تەرگەۋ جٷرٸپ جاتىر. بٸرنەشە ساراپتاما تاعايىندالدى.
جاس كەلٸنشەك قازا بولعان ليفت ەسٸگٸ سول كٷيٸ اشىق تۇر. تۇرعىندار ەسٸك الدىنا اعاش قويعان.
