Lift ishinde maska úshin tóbelesken astanalyqtar videoǵa túsip qaldy. Janjal videosy áleýmettik jelilerde tarady. Elordalyq politsiia departamenti jaǵdaiǵa qatysty túsinik berdi, - dep habarlaidy Tengrinews.kz.
Videoda liftige úsh qyz kirgenin kórýge bolady. Olardyń ekeýinde betperde bar. Keiin olar maskasyz qyzben tóbelese bastaidy. Jelide qyzdardyń biri ne bolǵanyn aityp berdi.
"2021 jyly 18 aqpanda liftide eki belgisiz áiel maǵan "maskasyz" ekenimdi aityp shabýyl jasady. Men olarmen sózge kelip qalmaý úshin maskamdy aldym. Biraq bul olarǵa jetkiliksiz boldy. Jasy úlkenirek áiel birinshi betimnen urdy, men ony iterip jibermek boldym, sóitip olar maǵan jabylyp, beiádep sózder aityp, shashymnan ustap aldy.
Olar moinymnan, basymnan uryp, shashymdy juldy, esimnen tanyp qala jazdadym. Toǵyzynshy qabatqa deiin qinady. Men "Kómektesińder!" dei bastaǵanda, kórshilerdiń biri estip shyqqanda olar meni jibere salyp, kórshilerdiń aldynda meni nashaqor dep, aiǵailai bastady. Olarǵa men shabýyl jasady dedi. Sóitip tez úilerine qashyp ketti", - deidi qyz.
Qyzdyń aitýynsha, ol qazir dárigerge qaralyp, nevropatologpen emdelip jatyr.
Politsiia departamenti videodaǵy úsheýi de tabylǵanyn jáne olar bir-birine qarsy málimdeme jazǵanyn aitty. Tártip saqshylary turǵyn úi kesheniniń liftindegi janjal sebebi maska bolǵanyn da rastady.
"23 jastaǵy astanalyq qyzǵa liftige kirgen eki áiel eskertý jasaǵany anyqtaldy. Sodan keiin janjal shyǵyp, ol tóbeleske ulasqan.
Sot-meditsinalyq saraptama nátijeleri boiynsha, kináli adamdy qoldanystaǵy zańnamaǵa sáikes jaýapqa tartý týraly sheshim qabyldanady", - dep habarlady Nur-Sultan PD baspasóz qyzmetindegiler.
Politsiia departamenti ókilderi turǵyndarǵa karantin rejimi jalǵasyp jatqanyn eskertip, olardan sanitar normalardy saqtaýdy jáne qoǵamdyq tártipti buzbaýdy surady.
