QR Tótenshe jaǵdailar ministri Iýrii Ilin 3-shi qarashada Shahtinsk qalasyndaǵy Lenin atyndaǵy shahtada bes kenshiniń ómirin qiǵan apattyń sebebin aitty, dep habarlaidy QazAqparat.
«3 qarashada Lenin atyndaǵy shahtada bolǵan apat buryn burǵylanǵan drenajdyq uńǵymalardan gaz ben kómir shańynyń kóp mólsherde shyǵýyna bailanysty kenetten gazdinamikalyq qubylys nátijesinde paida boldy. Negizgi sebep – metannyń shańmen birge kóp mólsherde shyǵýynan №79 piket aimaǵyndaǵy burǵylaý stanogyndaǵy burǵylaý shtangasynyń metall bekitkishteriniń elementterine úikelýi saldarynan ushqyn paida bolyp, jarylys oryn alǵan», - dedi ministr.
Sondai-aq, Iýrii Ilin qaýipsizdik talaptarynyń buzylǵanyn aitty. Naqtyraq aitqanda injenerlik-tehnikalyq personal tarapynan tiisti baqylaý bolmaǵan, sonyń saldarynan jumys óndirisi durys uiymdastyrylmaǵan.
Qazirgi ýaqytta Lenin shahtasynyń 26 qyzmetkeri, onyń ishinde basshylyq laýazymdy atqaratyn eki sheteldik shahtadaǵy apatqa jaýapty bolyp anyqtaldy. Iaǵni, shahtadaǵy apatqa 100 paiyz basshylyq kináli.
Esterińizge sala keteiik, 3 qarasha túngi saǵat 3.03-te «ArselorMittal Temirtaý» AQ Kómir departamentiniń Lenin atyndaǵy shahtasynda metan gazy jarylǵan. Apat kezinde shahtada, jer astynda 106 adam bolǵan. 101 adam evakýatsiialandy, bes adam qaitys boldy, tórt adam aýrýhanaǵa jatqyzyldy. Sanaviatsiia brigadasy zardap shekkenderdiń jaǵdaiy boiynsha tótenshe jaǵdai bolǵan jerde konsiliým quryp, eki kenshi Qaraǵandyǵa jetkizilip, ota jasaldy.
Atalǵan derekke qatysty QR QK 277-baby 3-bóligi «Taý-ken nemese qurylys jumystaryn júrgizý kezinde qaýipsizdik erejelerin buzý» boiynsha qylmystyq is qozǵaldy.
Keiin «ArselorMittal Temirtaý» AQ Kómir departamentiniń direktory Arman Qalyqov Lenin atyndaǵy shahtadaǵy apattyń sebebin atady. Onyń sózinshe, gazdy drenajdy uńǵymalardy burǵylaý kezinde kenet metan shyǵa bastaǵan.
«ArselorMittal Temirtaý» AQ-nyń barlyq segiz shahtasy bir táýlikke toqtatyldy.
Keiinirek qaitys bolǵandardyń esimderi belgili boldy.
5 qarashada Shahtinsk qalasynda Lenin atyndaǵy shahtadaǵy apat kezinde qaza tapqan bes kenshi jerlendi. Marqumdardy sońǵy saparǵa týystary men jaqyndary, áriptesteri jáne qala turǵyndary shyǵaryp saldy.
