قر تٶتەنشە جاعدايلار مينيسترٸ يۋريي يلين 3-شٸ قاراشادا شاحتينسك قالاسىنداعى لەنين اتىنداعى شاحتادا بەس كەنشٸنٸڭ ٶمٸرٸن قيعان اپاتتىڭ سەبەبٸن ايتتى, دەپ حابارلايدى قازاقپارات.
«3 قاراشادا لەنين اتىنداعى شاحتادا بولعان اپات بۇرىن بۇرعىلانعان درەناجدىق ۇڭعىمالاردان گاز بەن كٶمٸر شاڭىنىڭ كٶپ مٶلشەردە شىعۋىنا بايلانىستى كەنەتتەن گازديناميكالىق قۇبىلىس نەتيجەسٸندە پايدا بولدى. نەگٸزگٸ سەبەپ – مەتاننىڭ شاڭمەن بٸرگە كٶپ مٶلشەردە شىعۋىنان №79 پيكەت ايماعىنداعى بۇرعىلاۋ ستانوگىنداعى بۇرعىلاۋ شتانگاسىنىڭ مەتالل بەكٸتكٸشتەرٸنٸڭ ەلەمەنتتەرٸنە ٷيكەلۋٸ سالدارىنان ۇشقىن پايدا بولىپ, جارىلىس ورىن العان», - دەدٸ مينيستر.
سونداي-اق, يۋريي يلين قاۋٸپسٸزدٸك تالاپتارىنىڭ بۇزىلعانىن ايتتى. ناقتىراق ايتقاندا ينجەنەرلٸك-تەحنيكالىق پەرسونال تاراپىنان تيٸستٸ باقىلاۋ بولماعان, سونىڭ سالدارىنان جۇمىس ٶندٸرٸسٸ دۇرىس ۇيىمداستىرىلماعان.
قازٸرگٸ ۋاقىتتا لەنين شاحتاسىنىڭ 26 قىزمەتكەرٸ, ونىڭ ٸشٸندە باسشىلىق لاۋازىمدى اتقاراتىن ەكٸ شەتەلدٸك شاحتاداعى اپاتقا جاۋاپتى بولىپ انىقتالدى. ياعني, شاحتاداعى اپاتقا 100 پايىز باسشىلىق كٸنەلٸ.
ەستەرٸڭٸزگە سالا كەتەيٸك, 3 قاراشا تٷنگٸ ساعات 3.03-تە «ارسەلورميتتال تەمٸرتاۋ» اق كٶمٸر دەپارتامەنتٸنٸڭ لەنين اتىنداعى شاحتاسىندا مەتان گازى جارىلعان. اپات كەزٸندە شاحتادا, جەر استىندا 106 ادام بولعان. 101 ادام ەۆاكۋاتسييالاندى, بەس ادام قايتىس بولدى, تٶرت ادام اۋرۋحاناعا جاتقىزىلدى. ساناۆياتسييا بريگاداسى زارداپ شەككەندەردٸڭ جاعدايى بويىنشا تٶتەنشە جاعداي بولعان جەردە كونسيليۋم قۇرىپ, ەكٸ كەنشٸ قاراعاندىعا جەتكٸزٸلٸپ, وتا جاسالدى.
اتالعان دەرەككە قاتىستى قر قك 277-بابى 3-بٶلٸگٸ «تاۋ-كەن نەمەسە قۇرىلىس جۇمىستارىن جٷرگٸزۋ كەزٸندە قاۋٸپسٸزدٸك ەرەجەلەرٸن بۇزۋ» بويىنشا قىلمىستىق ٸس قوزعالدى.
كەيٸن «ارسەلورميتتال تەمٸرتاۋ» اق كٶمٸر دەپارتامەنتٸنٸڭ ديرەكتورى ارمان قالىقوۆ لەنين اتىنداعى شاحتاداعى اپاتتىڭ سەبەبٸن اتادى. ونىڭ سٶزٸنشە, گازدى درەناجدى ۇڭعىمالاردى بۇرعىلاۋ كەزٸندە كەنەت مەتان شىعا باستاعان.
«ارسەلورميتتال تەمٸرتاۋ» اق-نىڭ بارلىق سەگٸز شاحتاسى بٸر تەۋلٸككە توقتاتىلدى.
كەيٸنٸرەك قايتىس بولعانداردىڭ ەسٸمدەرٸ بەلگٸلٸ بولدى.
5 قاراشادا شاحتينسك قالاسىندا لەنين اتىنداعى شاحتاداعى اپات كەزٸندە قازا تاپقان بەس كەنشٸ جەرلەندٸ. مارقۇمداردى سوڭعى ساپارعا تۋىستارى مەن جاقىندارى, ەرٸپتەستەرٸ جەنە قالا تۇرعىندارى شىعارىپ سالدى.
