Qazaqstanda sport salasyndaǵy reformalardyń alǵashqy nátijeleri jariialandy. Reforma aiasynda 8 mlrd teńgeden astam biýdjet qarajaty únemdelgen, dep habarlaidy ult.kz.
Týrizm jáne sport ministrliginiń málimetinshe, únemdeýge kásibi sport klýbtaryn qarjylandyrýǵa limit engizý jáne legionerlerdi biýdjet esebinen qarjylandyrýdan bas tartý yqpal etken.
Únemdelgen qarajat aiasynda balalar sportyn qoldaýǵa da kóbirek kóńil bólingen. Sport mektepterindegi bir tárbielenýshige jyl saiyn bólinetin qarjy 233 myń teńgeden 415 myń teńgege deiin artqan. Iaǵni, balalar sportyna bólinetin qarjy eki esege jýyq ósken.
Sonymen qatar sport mektepterindegi jattyqtyrýshy-oqytýshylardyń jalaqysy 30%-ǵa artqan. Qazirgi tańda 3 511 jattyqtyrýshy-oqytýshy tiisti testileýden ótken.
Ministrlik sport uiymdaryn basqarý júiesinde de ózgerister bolǵanyn atap ótti. 2025 jylǵy qyrkúiekten bastap basshylardy rotatsiialaýdyń biryńǵai tártibi engizilip, sport uiymdarynyń birinshi basshylaryn taǵaiyndaý ashyq konkýrs arqyly júzege asyryla bastaǵan.
Búginde 112 taǵaiyndaýdyń 86-sy nemese 76%-y konkýrs nátijesinde júrgizilgen.
Vedomstvonyń málimetinshe, reformalardyń negizgi maqsaty – biýdjet qarajatyn tiimdi paidalanyp, balalar sporty men sport rezervin damytýǵa jáne sportshylar men jattyqtyrýshylardy qoldaýǵa basymdyq berý.
