Resei syrtqy ister ministri Sergei Lavrov Máskeý men Pekin dollarmen jáne "Batystyń baqylaýyndaǵy" tólem júielerimen esep aiyrysýdan bas tartý kerek dep sanaidy. Onyń paiymdaýynsha, Resei men Qytai osy arqyly sanktsiianyń saldaryn azaita alady. Bul týraly ol qytailyq basylymdarǵa bergen suhbatta aitty. Lavrovtyń sózi Resei SIM resmi saitynda jariialandy.
Resei syrtqy ister ministriniń oiynsha, AQSh-tyń maqsaty – "Resei men Qytaidyń tehnikalyq damýyna kedergi keltirý". Lavrov Batystyń, sonyń ishinde Vashingtonnyń basty quraly – sanktsiia dep sanaidy.
"Olar klassikalyq diplomatiiany qoldanýdy úirenip aldy" degen Lavrov AQSh "saiasi-diplomatiialyq kelissózderdi "ýltimatým", "talabyn oryndatý" júiesimen júrgizedi dep sanaidy. Onyń oiynsha, "bul – diplomatiia emes".
Naýryzdyń basynda AQSh prezidenti Djo Baiden Aleksei Navalnyidyń ýlanýyna bailanysty Reseige alǵashqa sanktsiiany salǵan. Qara tizimge organ ókilderi, prezident ákimshiligi basshysynyń birinshi orynbasary Sergei Kirienko, FSB basshysy Aleksandr Bortnikov kirgen. Buǵan qosa, AQSh Reseidiń áskeri maqsatta qoldanylatyn taýarlardy elge kirgizýge tyiym saldy.
Resei jańa sanktsiialardy "Reseige qarsy shabýyl" dep sipattady. 18 naýryzda Aq úi alda Reseige taǵy shekteýler bolatynyn málimdedi.
Resei biligi 2018 jyly kúzde AQSh sanktsiialaryn ainalyp ótý úshin dollardan bas tartý jospary baryn aitqan. Bul ideiany memlekettik VTB bank basshysy Andrei Kostin jariialaǵan. Ol dollardyń ornyna eýro, rýbl ia iýandy usynǵan.
