Reseilik saiasatkerler Qazaqstannyń aýmaqtyq tutastyǵy týraly arandatýshylyq málimdemeler jasai otyryp, ózderine nazar aýdartýǵa tyrysyp jatyr. Bul týraly eldiń SIM basshysy Sergei Lavrov málimdedi, dep habarlaidy "Ult aqparat" «Habar 24» telearnasyna silteme jasap.
«Reseidiń Qazaqstanǵa qatysty saiasatyn aiqyndaityndar qatarynan mundai sózder aitylmady jáne bolashaqta da aitylmaidy» , - dedi Lavrov «Habar» agenttigi basqarma tóraǵasy Erlan Bekhojinge bergen ekskliýzivti suhbatynda.
«Saiasatkerler óz mansabyn árqalai qurady. Daýly sóz qýatyn saiasatkerler de joq emes. Daýly bolyp kórinetin máselelerdi ortaǵa salǵandy unatatyn saiasatkerler de bar. Olar ózderine nazar aýdartýdy maqsat etedi. Bizde qalai aitatynyn bilesiz be: "Jaqsy ma, jaman ba mańyzdy emes, eń bastysy - sen týraly gazetterde jazsa bolǵany". Múmkin osydan shyǵar. Qazaqstanǵa qatysty Resei Federatsiiasynyń saiasatyn aiqyndaityn tulǵalar eki el arasyndaǵy kelisimderdiń qaisybirine shúbá keltiretin eshqandai sóz aitpady jáne aitpaidy da. Atalǵan kelisimder bir-birimizdiń egemendigimizdi, aýmaqtyq tutastyǵymyzdy, saiasi táýelsizdigimizdi syilaýǵa negizdelgen. Biz eki el basshylarymen kelisilip, qol qoiylǵan, parlament ruqsat etken, zań, halyqaralyq quqyqtyń bóligi sanalatyn qujattar negizinde odaqtastyqty damytýdamyz. Saiasatkerlerdiń, jańa parlamentariilerdiń kúmándi, keide arandatýshy sózderi demokratiialyq ómirdiń ainalyp óte almaityn bóligi dep oilaimyn. Bizdiń halqymyzdyń qarym-qatynasyna syzat túsiretin osyndai sózder pikirtalas klýbtarynan aspasa bolǵany. Bizdiń qarym-qatynasymyzdyń halyqaralyq-quqyqtyq bazasyn buzatyn mundai sózderdiń eshqashan shynaiy saiasat mańynda turmaitynyna kepil bola alamyn», - dep qorytty saiasatker.
Buǵan deiin Resei Memlekettik Dýmasynyń Bilim jáne ǵylym komitetiniń tóraǵasy Viacheslav Nikonov "Birinshi arnadaǵy" "Bolshaia igra" baǵdarlamasynda "Qazaqstan bolǵan joq, Soltústik Qazaqstan múlde qonystanbaǵan. Olar (qazaqtar. - Eskert.) áldeqaida ońtústikte bolǵan. Jáne, shyn máninde, Qazaqstan aýmaǵy - bul Resei men Keńes Odaǵynyń úlken syiy" dep málimdegen. Qazaqstanda reseilik depýtattyń málimdemesi úlken qoǵamdyq rezonans týdyrdy.
Nikonovtyń ózi daýly sózine túsinikteme berdi. "Qazaqstan Respýblikasynyń shekarasyna ainalǵan Qazaq KSR shekaralaryn aiqyndaý kezinde Qazaqstannyń múddeleri tolyq kólemde saqtaldy dep oilaimyn. Bul týraly "Bolshaia igra" baǵdarlamasynda osyny aitpaq boldym. Osy múmkindikti paidalanyp, baýyrlas Qazaqstan halqyna degen eń jyly sezimderimdi taǵy da bildiremin", - dep jazdy Nikonov Telegram-kanalynda.
