Resei syrtqy ister ministri Sergei Lavrov Máskeý Armeniianyń jańa biligi sybailas jemqorlyqqa qarsy kampaniia aiasynda máskeýshil burynǵy saiasi basshylardyń qýdalanyp jatqanyna alańdaitynyn málimdedi. Lavrov bul jaiynda 31 shildede Armeniianyń burynǵy prezidenti Robert Kocharian 2008 jyly ózine deiingi reseishil prezidentke qarsy narazylyq aktsiiasyn qatań basyp-janshydy dep aiyptalǵan soń aityp otyr.
1998-2008 jyldary Armeniia prezidenti bolǵan Robert Kocharian 27 shilde kúni 2008 jyly daýly prezident sailaýynan soń oppozitsiia ótkizgen narazylyq aktsiialaryn kúshpen basyp-janshydy degen kúdikpen qamaýǵa alynǵan.
Sol kúni Resei bastaǵan Ujymdyq qaýipsizdik sharty uiymynyń bas hatshysy Iýrii Hachatýrov ta Kocharian siiaqty 2008 jyly 1 naýryzda bolǵan narazylyqta 10 demonstranttyń qazasyna bailanysty Armeniianyń konstitýtsiialyq qurylymyn qulatpaq boldy dep aiyptalǵan.
Hachatýrov pen Kocharian ózderine taǵylǵan aiypty teristep, onyń saiasi astary baryn málimdegen.
"Sońǵy birneshe kúnde bolyp jatqan oqiǵalar Armeniianyń jańa basshylyǵynyń ózine deiingi bilik ókilderin saiasi maqsatta qýdalamaimyz degen taiaýda jasaǵan málimdemesine qaishy keledi. Máskeý Erevannyń odaqtasy retinde qashan da Armeniianyń turaqty bolýyna múddelilik tanytqan jáne ol elde bolyp jatqan oqiǵalar bizdi de alańdatýy tiis" dedi Lavrov.
Lavrov Syrtqy ister ministrligi alańdaýshylyqqa bailanysty Armeniia biligi "konstrýktivti jaýap" qaitarady dep úmittenetinin aitty.
Armeniia premer-ministri Nikol Pashinian mamyr aiynda burynǵy úkimetke qarsy demonstratsiia nátijesinde bilikke kelgen. Taiaýda ol sybailas jemqorlyqty joiý kampaniiasyn bastap, onyń aiasynda burynǵy birneshe joǵary shendi sheneýnik ustalǵan. Pashinian halyq tolqýlary nátijesinde bilikke kelgen Grýziia men Ýkraina basshylary siiaqty emes, Máskeýmen jaqsy qarym-qatynas ornatýdy qoldaitynyn aitady.
Azattyq
