رەسەي سىرتقى ٸستەر مينيسترٸ سەرگەي لاۆروۆ مەسكەۋ ارمەنييانىڭ جاڭا بيلٸگٸ سىبايلاس جەمقورلىققا قارسى كامپانييا اياسىندا مەسكەۋشٸل بۇرىنعى ساياسي باسشىلاردىڭ قۋدالانىپ جاتقانىنا الاڭدايتىنىن مەلٸمدەدٸ. لاۆروۆ بۇل جايىندا 31 شٸلدەدە ارمەنييانىڭ بۇرىنعى پرەزيدەنتٸ روبەرت كوچاريان 2008 جىلى ٶزٸنە دەيٸنگٸ رەسەيشٸل پرەزيدەنتكە قارسى نارازىلىق اكتسيياسىن قاتاڭ باسىپ-جانشىدى دەپ ايىپتالعان سوڭ ايتىپ وتىر.
1998-2008 جىلدارى ارمەنييا پرەزيدەنتٸ بولعان روبەرت كوچاريان 27 شٸلدە كٷنٸ 2008 جىلى داۋلى پرەزيدەنت سايلاۋىنان سوڭ وپپوزيتسييا ٶتكٸزگەن نارازىلىق اكتسييالارىن كٷشپەن باسىپ-جانشىدى دەگەن كٷدٸكپەن قاماۋعا الىنعان.
سول كٷنٸ رەسەي باستاعان ۇجىمدىق قاۋٸپسٸزدٸك شارتى ۇيىمىنىڭ باس حاتشىسى يۋريي حاچاتۋروۆ تا كوچاريان سيياقتى 2008 جىلى 1 ناۋرىزدا بولعان نارازىلىقتا 10 دەمونسترانتتىڭ قازاسىنا بايلانىستى ارمەنييانىڭ كونستيتۋتسييالىق قۇرىلىمىن قۇلاتپاق بولدى دەپ ايىپتالعان.
حاچاتۋروۆ پەن كوچاريان ٶزدەرٸنە تاعىلعان ايىپتى تەرٸستەپ, ونىڭ ساياسي استارى بارىن مەلٸمدەگەن.
"سوڭعى بٸرنەشە كٷندە بولىپ جاتقان وقيعالار ارمەنييانىڭ جاڭا باسشىلىعىنىڭ ٶزٸنە دەيٸنگٸ بيلٸك ٶكٸلدەرٸن ساياسي ماقساتتا قۋدالامايمىز دەگەن تاياۋدا جاساعان مەلٸمدەمەسٸنە قايشى كەلەدٸ. مەسكەۋ ەرەۆاننىڭ وداقتاسى رەتٸندە قاشان دا ارمەنييانىڭ تۇراقتى بولۋىنا مٷددەلٸلٸك تانىتقان جەنە ول ەلدە بولىپ جاتقان وقيعالار بٸزدٸ دە الاڭداتۋى تيٸس" دەدٸ لاۆروۆ.
لاۆروۆ سىرتقى ٸستەر مينيسترلٸگٸ الاڭداۋشىلىققا بايلانىستى ارمەنييا بيلٸگٸ "كونسترۋكتيۆتٸ جاۋاپ" قايتارادى دەپ ٷمٸتتەنەتٸنٸن ايتتى.
ارمەنييا پرەمەر-مينيسترٸ نيكول پاشينيان مامىر ايىندا بۇرىنعى ٷكٸمەتكە قارسى دەمونستراتسييا نەتيجەسٸندە بيلٸككە كەلگەن. تاياۋدا ول سىبايلاس جەمقورلىقتى جويۋ كامپانيياسىن باستاپ, ونىڭ اياسىندا بۇرىنعى بٸرنەشە جوعارى شەندٸ شەنەۋنٸك ۇستالعان. پاشينيان حالىق تولقۋلارى نەتيجەسٸندە بيلٸككە كەلگەن گرۋزييا مەن ۋكراينا باسشىلارى سيياقتى ەمەس, مەسكەۋمەن جاقسى قارىم-قاتىناس ورناتۋدى قولدايتىنىن ايتادى.
ازاتتىق
