Latyn álipbiine kóshý. Bul másele mektep oqýshylaryna da qozǵaý salǵandai. Jańasha oilai biletin zerek oqýshylarymyzǵa qanat bitirgen. Sondai talapty jastyń biri - ońtústikqazaqstandyq Amangeldi Júsip latyn álipbiiniń 3D kitapshasyn jasap shyǵardy.
Bul baǵytta úsh ai talaptanyp, bilimin shyńdaǵan. Izdenistiń arqasynda jańa tehnologiia eki aptanyń ishinde daiyn boldy: kitaptyń dizainy, áripterdiń daýysy, 3d modelderi, bári tartymdy. Onda AR tehnologiiasy qoldanylǵan.
Tehnologiianyń ereksheligi – smartfondaǵy qosymsha baǵdarlama arqyly kamerany kitaptyń arnaiy betine qaratqanda oqýlyqtan 3D modeldegi dúnieler shyǵady. Kitapsha álipbidiń eki úlgisinde de ázirlendi.
Árine, basty erekshelik – Elbasymyzdyń «Bolashaqqa baǵdar: rýhani jańǵyrý» baǵdarlamasyna sai kitapta ulttyq naqyshtaǵy oiýlarmen jasalýynda.
Sondai-aq, kitapty estý qabileti nashar oqýshylar áripterdi vizýaldy túrde úirene alady. Kózi nashar kóretinder áripterdiń daýysyn estý arqyly jaqsy túsinedi. Jańa tehnologiialyq joba ázirge, 10 árippen ǵana shektelip otyr.
– Mektepterge, balabaqshalarǵa baryp tájiribelik synaqtar ótkizdim. Búldirshinderdiń bir kitapqa talasyp qalǵan sátteri de boldy. Tipti áli sóilei almaityn eki jastaǵy inim álipbidegi áripterdiń dybystaýlaryn qaitalap úirenýde, – deidi ózi.
Jyl sońyna deiin barlyq 32 áripti jasap bitirmek. Eger qoldaý bolsa, qarasha aiynda bári daiyn bolar edi. Tek kitapshamen toqtalmai, latyn álipbiine arnap animatsiialyq serialdy mýltfilm jasap kórmek oiy da bar.
Bári de bilimge degen qulshynystyń arqasy shyǵar. Amangeldi búginge deiin birneshe ǵylymi jobaǵa da qatysqan. Qazaqtyń ulttyq oiyny aqsúiektiń kompiýterlik nusqasyn da kópshilikke usynǵan-tyn.
– Latyn álipbiine ótý arqyly biz kóptegen eldermen básekelestik qabiletimizdi arttyramyz. Eger kishkentailarǵa qazirden bastap latyn álipbiin úiretsek, balalar aǵylshyn tilin tez meńgeredi. Til úirenýge degen kedergi bolmas edi. Bul álipbige ótý bolashaqqa bastar naqty qadam, – deidi oqýshy zamandastaryna ún tastai.
«Ónerlige óris keń». Oiy zerek oqýshy «Meniń Armanym» intellektýaldy shoýyna qatysý úshin Astanaǵa jol júrip barady. Buǵan deiin jartylai finalǵa joldama alyp kelgen edi. Endi aldynda finaldyq synǵa ótý mindeti tur.
Minekei, jańa zamannyń tehnologiialaryn meńgerip ósken osyndai oqýshylarymyz bar. «Bilimdiniń júzi jaryq». Biz jas darynnyń aldaǵy josparlaryna sáttilik tileimiz!
