Aqtóbe qalasynda bolǵan lańkestik shabýyl kezinde №6655 áskeri bóliminiń qyzmetkerleri Qainarbek Tastambekov pen Qaiyrǵali Orazjanov ájethanaǵa tyǵylyp, keiin oqiǵa ornynan qashyp ketken bolatyn. Ekeýi de sottaldy. Al búgin Qainarbek Tastambekov raqymshylyqqa ilikti, dep habarlaidy QazAqparat tilshisi.
maýsymdaǵy lańkestik oqiǵaǵa biyl bir jyl tolady. Terroristik akt jasaǵandardyń bári ustalyp, sottalǵan soń, áskeri bólim qyzmetkerlerine jaza kesildi.
№6655 áskeri bóliminiń qos maiory Qainarbek Tastambekov pen Qaiyrǵali Orazjanovtyń qarýly shabýyl kezinde Áskeri jarǵyny buzyp, oqiǵa ornynan ketip qalǵany dáleldendi. Keiin ekeýi ustalyp, ústerinen is qozǵaldy.
Olar Qylmystyq kodekstiń «Ishki qyzmet atqarýdyń nemese garnizonda kezekshilikte bolýdyń jarǵylyq qaǵidalaryn buzý» baby boiynsha aiypty dep tanylyp, Qaiyrǵali Orazjanov 3 jyl 5 aiǵa, Qainarbek Tastambekov 4 jyl 5 aiǵa bas bostandyǵynan aiyryldy. Ekeýi de jazasyn jalpy rejimdegi túzeý koloniiasynda ótep otyr.
Al búgin eks-áskeri qyzmetker Qainarbek Tastambekovtyń Táýelsizdiktiń 25 jyldyǵyna orai raqymshylyqqa ilikkeni belgili boldy. Qainar Tastambekovtyń qorǵaýshysy Stanislav Nikiforovtyń aitýynsha, sot sheshimimen onyń qorǵaýyndaǵy burynǵy áskeri qyzmetker jazanyń 3 jyl 8 aiyn bostandyqta júrip óteidi.
«Tastambekov túzetý koloniiasynda otyr. Sot otyrysy onlain-rejimde ótti. Sot sheshimimen «Raqymshylyq týraly» Zańǵa sáikes Tastambekovtyń bas bostandyǵynan aiyrý jazasy bas bostandyǵyn shekteýge almastyryldy. Prokýratýra qarsy aryz túsirmese, Tastanbekov qalǵan 3 jyl 8 aiyn bostandyqta óteidi»,- deidi qorǵaýshy.
