QR halyq ártisi, QR Memlekettik syilyǵynyń laýreaty Laki Kesoglý "Opera №2" ánin Vitas pen Dimash Qudaibergenovtiń oryndaýlaryn salystyrdy, - dep habarlaidy "Ult aqparat" kaz.tengrinews.kz portalyna silteme jasap.
Halqy ártisi Dimashtyń daýsy mýzyka tilinde qalai atalatynyn aitty. "Dimashtyń daýsy sirek. Onyń daýys túri tenor altino nemese kontrtenor dep atalady. Ol klassika janrynda dami alady. Biraq ol muny qalamaidy. Álemde kontrtenorlar saýsaqpen sanarlyq. Olar tanymal emes, biraq bar. Bul óte sirek kezdesetin daýystar. Ol óte jas, 22 jasta osyndai zor jetistikke jetip otyr. Ony Vitaspen salystyrýdyń qajeti joq, men sizge resmi málimdeme jasai alamyn - Vitastyń múmkinshiligi Dimashtyń daýsynyń janynda túk te emes", - dep málimdedi ol.
Aitýynsha, bul Dimashtyń tabiǵi daýsy. "Ol joǵary tenor notalarynda da aita alady, biraq ol óziniń qalypty daýsymen de án shyrqaidy, onysy jaǵymdy estiledi. Meniń bilýimshe, ol Aqtóbe mýzykalyq ýchilishesin klassik retinde oqyp shyqty, ol jaqta estradany oqytpaidy. Sondyqtan, búginde Dimash kósh basyndaǵy ánshimiz. Onyń qasyna eshkimdi de qoiýǵa bolmaidy. Qalǵan juldyzsymaq ánshiler onyń mańyna da jaqyndai almaidy. Al onyń Vitaspen salystyrý bilimsizdikten. Vitasty tyńdap kórińizder, ol óz daýsymen aitqanda arǵy jaǵynda eshteńeniń joq ekenin baiqaisyz. Onyń daýsy faltset, damyǵan faltset qana, osy múmkindigin qoldanyp qana júr. Taiaýda Vitastyń prodiýseri ánderin aitýǵa tyiym saldy dep estidim, bul degenińiz olar básekelestikten qorqyp otyr degen sóz. Al menińshe, bul konkýrsta Dimash jeńimpaz atanady", - dep boljady ártis.
Onyń aitýynsha, qytailyq baiqaýda dybys rejisserleri eshqandai da siqyr jasap otyrǵan joq. "Dimashtyń diapazony tórt oktavaǵa keń. Odan da joǵary bolmasa. Kásip iesi retinde aitaiyn, bizde daryndy, mýzykalyq daryny bar degen termin bar. Adam án salǵanda ol jaily "janymen aitty", "jylýy seziledi" dep jatamyz. Bul mýzykaldyq dep atalady. Bul qasiet barlyǵynda bar deý qiyn. Iaǵni adamnyń daýys múmkinshilikteri kóp bolýy múmkin, biraq ony tyńdap kórseń, bos bolyp shyǵady. Al Dimashta barlyǵy da bar, 22 jasynda sahnaǵa daiyndyqpen shyǵyp júr. Iaǵni ne jaily án aityp jatqanyn biletin ánshi. Bul óte qundy", - dedi ol.
Kesoglý Qudaibergenovti burynnan biletinin, shyǵarmashylyǵyn sholyp júrgenin de aityp otyr.
"Men Dimashty burynnan bilemin, jarylys jasaitynyn kútip júrmin. Birneshe jyl buryn Astanada túrli kontsertterge qatystym, sol kezde ol da bolǵan. Sol ýaqytta-aq oǵan nazar aýdardym. Keiin kontsertterdiń birinde áńgimelestim. Suhbattarymnyń birinde Dimash Qudaibergenov degen jas jigittiń baryn, onyń "Slavian bazarynda" naǵyz dúmpý týǵyzǵanyn aitqanmyn. Bul degen keremet jetistik qoi. Ánshilerimizdiń bireýi de "Slavian bazarynda" bas júlde almaǵan. Al bizde bul jaǵdai nazarsyz qaldy. Menińshe, ádiletsizdik", - deidi Laki Kesoglý.
"Sońǵy ret 9-ynda Astanadaǵy kontsertte án aittym, ol da boldy. Grim bólmesinde áńgimeleskenimizde ol Qytaiǵa bara jatqanyn aitty. Biraq sol kezde qandai konkýrs ekenin bilmedim, endi mine, estip jatyrmyn, Youtube hostinginen kórdim, dál osyndai jaǵdai bolýy kerek edi dep oilaǵan edim. Ol óte daryndy. Tabiǵatynan, qudaidyń bergen daryny, vokaly erekshe, mundai daýys sirek kezdesedi. Eń bastysy ol maqsatyna berik, ánmen ómir súredi, mamandyǵyn súiedi", - dep qorytty sózin Laki Kesoglý.
Aita keteiik, Dimash Qudaibergenov 28 qańtarda Qytaida ótip jatqan I Am a Singer mýzykalyq konkýrsynyń ekinshi kezeńinde de jeńimpaz atanǵan bolatyn. Ánshi reseilik ataqty Vitastyń "Opera 2" atty týyndysyn oryndaǵan edi.
