Segizinshi qabattan qulai jazdaǵan 3 jasar qyzdyń anasy suhbat berip, kóptiń kókeiindegi suraqtarǵa jaýap berdi, - dep habarlaidy Tengrinews.kz agenttigi Eýraziia birinshi arnasyna silteme jasap.
Áiel arnaǵa bergen suhbatynda qyzyn jalǵyz ózi tárbielep otyrǵanyn, eki jerde jumys isteitinin aitady.
"11 mamyrda ómirimde esten ketpes kún boldy. Qyzym balabaqshaǵa barmaidy, ózimmen birge jumysqa alyp júremin. Balabaqshaǵa bereiin desem, qymbat. 70 myńnan tómen emes. Dotatsiiamen bereiin desem, meniń balamnyń kezegi kelgenshe mektepke baratyn ýaqyty bolady", - deidi qyzdyń anasy.
Sol kúni anasy alys joldan kelgendikten, qyzynyń uiqysyn qimai ony inisine qaldyryp ketken eken. Onyń aitýynsha, sol kúni birinshi ret úige qaldyrǵan. Sosyn inisin de jumysqa shaqyryp, bala úide jalǵyz qalǵan.
"Jumysym jaqyn bolǵan soń, baram da kelem dep oiladym", - deidi ol.
Qyzynyń segizinshi qabatta salbyrap turǵanyn dalada shýlap júrgen adamdardan estigen.
"Men qyzymdy ólip qaldy dep oiladym. Odan keiin ne bolǵany esimde joq. Terezelerdi jaýyp ketkenmin, tipti oianyp qalsa terezege shyqpasyn dep saqtanyp, oryndyqtardy da balkonǵa kirgizip ketkenmin", - deidi ol.
Onyń aitýynsha, qyzy aiaǵynyń astyna jumsaq oiynshyqtary men jastyǵyn qoiyp terezege shyqqan. Áiel qyzyn qutqaryp qalǵan azamattarǵa alǵysyn aitty.
"Qutqarǵan kisilerge kóp raqmet! Alladan qaitsyn! Ondai nárse ekiniń biriniń qolynan kelmeidi", - deidi úsh jasar qyzdyń anasy.
