سەگٸزٸنشٸ قاباتتان قۇلاي جازداعان 3 جاسار قىزدىڭ اناسى سۇحبات بەرٸپ, كٶپتٸڭ كٶكەيٸندەگٸ سۇراقتارعا جاۋاپ بەردٸ, - دەپ حابارلايدى Tengrinews.kz اگەنتتٸگٸ ەۋرازييا بٸرٸنشٸ ارناسىنا سٸلتەمە جاساپ.
ەيەل ارناعا بەرگەن سۇحباتىندا قىزىن جالعىز ٶزٸ تەربيەلەپ وتىرعانىن, ەكٸ جەردە جۇمىس ٸستەيتٸنٸن ايتادى.
"11 مامىردا ٶمٸرٸمدە ەستەن كەتپەس كٷن بولدى. قىزىم بالاباقشاعا بارمايدى, ٶزٸممەن بٸرگە جۇمىسقا الىپ جٷرەمٸن. بالاباقشاعا بەرەيٸن دەسەم, قىمبات. 70 مىڭنان تٶمەن ەمەس. دوتاتسييامەن بەرەيٸن دەسەم, مەنٸڭ بالامنىڭ كەزەگٸ كەلگەنشە مەكتەپكە باراتىن ۋاقىتى بولادى", - دەيدٸ قىزدىڭ اناسى.
سول كٷنٸ اناسى الىس جولدان كەلگەندٸكتەن, قىزىنىڭ ۇيقىسىن قيماي ونى ٸنٸسٸنە قالدىرىپ كەتكەن ەكەن. ونىڭ ايتۋىنشا, سول كٷنٸ بٸرٸنشٸ رەت ٷيگە قالدىرعان. سوسىن ٸنٸسٸن دە جۇمىسقا شاقىرىپ, بالا ٷيدە جالعىز قالعان.
"جۇمىسىم جاقىن بولعان سوڭ, بارام دا كەلەم دەپ ويلادىم", - دەيدٸ ول.
قىزىنىڭ سەگٸزٸنشٸ قاباتتا سالبىراپ تۇرعانىن دالادا شۋلاپ جٷرگەن ادامداردان ەستٸگەن.
"مەن قىزىمدى ٶلٸپ قالدى دەپ ويلادىم. ودان كەيٸن نە بولعانى ەسٸمدە جوق. تەرەزەلەردٸ جاۋىپ كەتكەنمٸن, تٸپتٸ ويانىپ قالسا تەرەزەگە شىقپاسىن دەپ ساقتانىپ, ورىندىقتاردى دا بالكونعا كٸرگٸزٸپ كەتكەنمٸن", - دەيدٸ ول.
ونىڭ ايتۋىنشا, قىزى اياعىنىڭ استىنا جۇمساق ويىنشىقتارى مەن جاستىعىن قويىپ تەرەزەگە شىققان. ەيەل قىزىن قۇتقارىپ قالعان ازاماتتارعا العىسىن ايتتى.
"قۇتقارعان كٸسٸلەرگە كٶپ راقمەت! اللادان قايتسىن! ونداي نەرسە ەكٸنٸڭ بٸرٸنٸڭ قولىنان كەلمەيدٸ", - دەيدٸ ٷش جاسار قىزدىڭ اناسى.
