Qoima jáne saýda alańdarymen qamtamasyz etý úshin «Qyzyljar» saýda-logistikalyq haby qurylady. Bul týraly Úkimet otyrysynda Soltústik Qazaqstan oblysynyń 2021-2025 jyldarǵa arnalǵan áleýmettik-ekonomikalyq damýynyń keshendi josparyn tanystyrý kezinde QR Ulttyq ekonomika ministri Áset Erǵaliev málim etti, dep habarlaidy QazAqparat.
«Qyzmettik belsendilikti damytý úshin eldiń ákimshilik ortalyqtarymen bailanysyn qamtamasyz etý úshin aviareister sany aiyna 16-dan 68-ge deiin artady. Óńirde týristik áleýetti kúsheitý jáne sportty damytý maqsatynda Imantaý-Shalqar kýrort aimaǵynda kópfýnktsionaldy týristik keshen salý qamtamasyz etiledi. Bul jylyna 100 myńnan 280 myń týristke deiin kóbeitýdi qamtamasyz etedi. Budan basqa, 100 adamǵa arnalǵan qonaq úii bar sport ortalyǵynyń, sondai-aq Petropavl qalasynda 3 myń orynǵa kópfýnktsionaldy sport saraiy salynady», - dedi ministr.
Budan basqa, kásipkerlikti damytý maqsatynda «Biznestiń jol kartasy – 2025» baǵdarlamasy aiasynda kásipkerlerdiń kreditteri boiynsha syiaqy mólsherlemesin sýbsidiialaý jáne kepildik berý, jańa biznes-ideialardy iske asyrý úshin memlekettik granttar berý, sondai-aq biznes sýbektilerine qajetti infraqurylymdy jetkizý kózdelgen.
Budan buryn habarlanǵandai, búgin Úkimet otyrysynda QR Ulttyq ekonomika ministri Áset Erǵaliev Soltústik Qazaqstan oblysynyń 2021-2025 jyldarǵa arnalǵan áleýmettik-ekonomikalyq damýynyń keshendi josparyn tanystyrdy. Jospardy iske asyrýdyń jalpy somasy 1,8 trln teńge.
