Qyzylorda qalalyq Jumyspen qamtý ortalyǵynda turǵyndardyń jappai jinalýy boiynsha áleýmettik jelide jariialanǵan beinejazbaǵa bailanysty tiisti sala basshylary túsinikteme berdi, dep habarlaidy "Ult aqparat".
Jumyspen qamtý ortalyǵynda adamdardyń kóptep jinalýyna qatysty mán-jaidy qala ákiminiń orynbasary Bektas Nuridinov baiandap berdi.
««Bastaý biznes» jobasy boiynsha kásipkerlik negizderine oqytýǵa ótinim qabyldanatyny týraly aldyn ala habarlandyrý jariialanǵan bolatyn. Degenmen, turǵyndar arasynda oǵan qujat qabyldaý bir kúnniń ishinde júrgiziledi degen jalǵan habar taraǵan. Osynyń saldarynan ortalyq aýmaǵynda 500-den astam adam jinalǵan. Oryn alǵan qolaisyzdyqqa bailanysty keshirim suraimyz. Oqiǵanyń mán-jaiy tekserilýde. Keleńsizdikke jol bergen mamandar jumysyna qyzmettik tekseris júrgiziledi», - dedi Qyzylorda qalasy ákiminiń orynbasary Bektas Nuridinov.
«Atameken» óńirlik kásipkerler palatasynyń «Bastaý biznes» jobasy boiynsha kásipkerlik negizderine oqytýǵa ótinim qabyldaý 19-23 sáýir aralyǵynda júrgiziletini buqaralyq aqparat quraldarynda jariialanǵan. Oqytý 26 sáýirden 3 qazanǵa deiin jalǵasady. Joba sheńberinde oblysta biylǵy jyly 2500 adamdy oqytý kózdelgen. Onyń ishinde Qyzylorda qalasy boiynsha 535 adam bilim alady.
«Osy maqsatta 20 sáýirden bastap barlyq Jumyspen qamtý ortalyqtary turǵyndardy tirkep, joldama berýdi bastaǵan edi. Oqýǵa úmitkerler jergiliktik ákimdikke, halyqty jumyspen qamtý ortalyqtaryna nemese «Atameken Services» kásipkerlerdiń «biryńǵai terezesi» portaly arqyly onlain-ótinim bere alady», - dedi oblystyq Jumyspen qamtýdy úilestirý jáne áleýmettik baǵdarlamalar basqarmasynyń basshysy Gaýhar Qalmaqova.
