Qyzylorda oblysy Jańaqorǵan aýdanyna qarasty Jaiylma aýylynyń turǵyny Aiazbi Fazylov jalań qolmen qasqyr aldy, dep habarlaidy QazAqparat.
Eldi meken Jańaqorǵan aýdanynyń taý betkeiinde ornalasqan. Jergilikti turǵyndardyń negizgi kúnkóris kózi - mal sharýashylyǵy.
Onyń aitýynsha, aýyl turǵyndary biyl taý jaqta maldy qasqyr tartyp ketip jatyr degendi jii estitin boldy. Sondai habardy estigen Aiazbi de mototsiklimen taýdaǵy jylqylardyń jai-kúiin bilý bilmek maqsatta jolǵa shyqqan. Qasynda Jumaǵali esimdi tanysy bar.
«Qara jolmen kele jatqanda jyńǵyldyń túbinen qasqyrdyń qasha jónelgenin kózimiz shaldy. Artynan dereý qýalai jóneldik. On shaqyrymdai ótkennen keiin onyń artyna ózim tústim. Bir mezette qasqyrdyń maǵan aibat shegip turǵanyn baiqadym. Arpalys bastaldy. Onyń da beriser túri joq. Jarty saǵattai ýaqyt ótkende ol maǵan qarai atyldy. Jan-dármenmen qolyma tas alyp ony basynan uryp úlgerdi. Qatty soqqydan esinen tanyp qaldy. Tumsyǵynan bailap tastadym. Mototsikldiń artyna óńgerip aldym. Jolai ol esin jidy. Alaida burynǵydai qaýqar kórsetýge shamasy kelgen joq», - dedi Aiazbi Fazylov.
Aitýynsha, ustaǵany qasqyrdyń qanshyǵy eken.
«Qolyma myltyq alyp shyqqan kezimde aldymnan qasqyr kezdesken emes. Jolai qoishylardyń úiine soqtym. Bir qyzyǵy, itterdiń bailaýda jatqan túz taǵysyna bettep kele almady. Eldiń aýzynda aitylatyn «Ittiń syrttany ǵana qasqyrdy alady» degen sózdiń rastyǵyna taǵy bir márte kózin jetkizdim», - dedi ol.
