قىزىلوردا وبلىسى جاڭاقورعان اۋدانىنا قاراستى جايىلما اۋىلىنىڭ تۇرعىنى ايازبي فازىلوۆ جالاڭ قولمەن قاسقىر الدى, دەپ حابارلايدى قازاقپارات.
ەلدٸ مەكەن جاڭاقورعان اۋدانىنىڭ تاۋ بەتكەيٸندە ورنالاسقان. جەرگٸلٸكتٸ تۇرعىنداردىڭ نەگٸزگٸ كٷنكٶرٸس كٶزٸ - مال شارۋاشىلىعى.
ونىڭ ايتۋىنشا, اۋىل تۇرعىندارى بيىل تاۋ جاقتا مالدى قاسقىر تارتىپ كەتٸپ جاتىر دەگەندٸ جيٸ ەستيتٸن بولدى. سونداي حاباردى ەستٸگەن ايازبي دە موتوتسيكلٸمەن تاۋداعى جىلقىلاردىڭ جاي-كٷيٸن بٸلۋ بٸلمەك ماقساتتا جولعا شىققان. قاسىندا جۇماعالي ەسٸمدٸ تانىسى بار.
«قارا جولمەن كەلە جاتقاندا جىڭعىلدىڭ تٷبٸنەن قاسقىردىڭ قاشا جٶنەلگەنٸن كٶزٸمٸز شالدى. ارتىنان دەرەۋ قۋالاي جٶنەلدٸك. ون شاقىرىمداي ٶتكەننەن كەيٸن ونىڭ ارتىنا ٶزٸم تٷستٸم. بٸر مەزەتتە قاسقىردىڭ ماعان ايبات شەگٸپ تۇرعانىن بايقادىم. ارپالىس باستالدى. ونىڭ دا بەرٸسەر تٷرٸ جوق. جارتى ساعاتتاي ۋاقىت ٶتكەندە ول ماعان قاراي اتىلدى. جان-دەرمەنمەن قولىما تاس الىپ ونى باسىنان ۇرىپ ٷلگەردٸ. قاتتى سوققىدان ەسٸنەن تانىپ قالدى. تۇمسىعىنان بايلاپ تاستادىم. موتوتسيكلدٸڭ ارتىنا ٶڭگەرٸپ الدىم. جولاي ول ەسٸن جيدى. الايدا بۇرىنعىداي قاۋقار كٶرسەتۋگە شاماسى كەلگەن جوق», - دەدٸ ايازبي فازىلوۆ.
ايتۋىنشا, ۇستاعانى قاسقىردىڭ قانشىعى ەكەن.
«قولىما مىلتىق الىپ شىققان كەزٸمدە الدىمنان قاسقىر كەزدەسكەن ەمەس. جولاي قويشىلاردىڭ ٷيٸنە سوقتىم. بٸر قىزىعى, يتتەردٸڭ بايلاۋدا جاتقان تٷز تاعىسىنا بەتتەپ كەلە المادى. ەلدٸڭ اۋزىندا ايتىلاتىن «يتتٸڭ سىرتتانى عانا قاسقىردى الادى» دەگەن سٶزدٸڭ راستىعىنا تاعى بٸر مەرتە كٶزٸن جەتكٸزدٸم», - دەدٸ ول.
