Qyzylordada politseiler er adamdy tutqyndap, onyń kóliginen iri kólemde esirtki zattaryn tapqan. Bul týraly ustalǵan er adamnyń áieli áleýmettik jeli arqyly málimdedi. Áiel adamnyń ishki ister organdary qyzmetkerleriniń zańsyz áreketine shara qoldanýdy suraǵan videosy jyldam taralyp jatyr, - dep habarlaidy Tengrinews.kz tilshisi.
Áiel adam ózin Elvira Mahanova dep tanystyrdy.
"14 jeltoqsan saǵat 18:30 shamasynda kúieýim Barahatov Rýslandy politsiia qyzmetkerleri ustady. Kóliktiń artynan kóp mólsherde esirtki zaty tabyldy", - deidi áiel.
Ary qarai ol videodaǵy jaǵdaidy túsindiredi.
"Qazir aq Lada Priora keledi. Osy kezde eki spetsnaz meniń kúieýimdi túsirip jatyr. Osy kezde sol mashinadan túsken adam kúieýimniń mashinasynyń artqy esigin ashyp, tolyqtai ishine kirip, bir zatty saldy. Esikti jaýyp, ary qari ketip qaldy", - deidi Mahanova.
Qyzylorda oblysy IID-niń ókilderi bul jaǵdaiǵa qatysty pikir bildirdi.
"Atalǵan derek 2017 jylǵy 19 jeltoqsanda Sotqa deiingi tergep tekserýdiń biryńǵai tizilimine QR QK 416-babynyń 4-bóligimen tirkelip, Qyzylorda oblysy Ishki Ister Departamentiniń Ózindik qaýipsizdik basqarmasymen tergep-tekserý jumystary bastaldy", - deidi vedomstvo ókilderi.
