Jaqynda ǵana «Mereili otbasy» respýblikalyq konkýrsynyń jeńimpazdary anyqtaldy.
Osymen besinshi jyl qatarynan uiymdastyrylǵan saiysqa elimizdiń ár óńirinen 3 myńǵa jýyq otbasy qatysyp, baq synady. Olardyń 16-sy ǵana aqtyq synǵa joldama alyp, jarystyń bas júldesin qanjyǵalaýǵa tyrysty. Úmitkerlerge halyq ǵalamtor arqyly daýys berip, úzdigin tańdady. Saiys qorytyndysy boiynsha Niiazqulovtar áýleti ózgelerden ozyq shyqty.
Elbasynyń bastamasymen 2014 jyldan bastap qoǵam nazaryn otbasylyq qundylyqtardy saqtaýǵa aýdarý ári ony dáripteý maqsatynda «Mereili otbasy» ulttyq konkýrsy ótkizilip keledi. Bul elimizde memlekettik deńgeide otbasy, januia uǵymdaryna kórsetiletin zor qurmetti pash etedi jáne oǵan erekshe nazar bólinetinin aiqyndaidy.
Biyl «Mereili otbasy» ulttyq baiqaýyna Qyzylorda oblysynan 361 otbasy qatysty. Árbir otbasy kópke úlgi bolǵan elge syily áýletter. Aimaqtyq kezeńniń aqtyq synyna joldama alǵan 12 otbasynyń barlyǵy syi-qurmetke bólengen edi. Biylǵy jyly alǵash ret Astana qalasynyń 20 jyldyǵyna jáne "Mereili otbasy" ulttyq respýblikalyq konkýrsyna 5 jyl tolýyna orai Elbasynyń bastamasymen gran-priden bolek 2 otbasyna diplomant ataǵy berildi. Sonyń biri Qyzylorda oblysynan Ishanqulovtar otbasy "Mereili otbasy" respýblikalyq konkýrsynyń diplomanty atandy. Ekinshi otbasy aqtóbelik Aitbaevtar otbasy.
Urpaǵymen kóktep-kógerip otyrǵan Ishanqulovtar osynaý aimaqtyq synnan súrinbei ótip, jeńis tuǵyrynan kórindi. Tylda talmai eńbektene júrip mal sharýashylyǵynda 36 jyl ter tókken otaǵasy Erǵali Ishanqul 81 jasta bolsa, otanasy Bahira Kamardinqyzy 80 jastaǵy zeinetker. Eriniń bir jaǵynda turmys taýqymetin bólise júrip 14 balany ómirge ákelip, «Altyn alqa», «Kúmis alqa» iegeri bola bildi. «Úlgili otbasy – qoǵam negizi» ustanymyndaǵy jandar 62 jyldan beri tatýlyq ýyzyna uiyp, úlgili ómir súrip keledi. Búginde, osynaý máýeli báiterektiń saiasynda 52 nemere, 25 shóbere jáne 1 shópshek bar. Erǵali Ishanqulov uzaq ýaqyt agro-ónerkásip salasynda qyzmet etken, balalarynyń kóbi de osy da salada jumys jasap júr. Ishanqulovtar áýletiniń balalary atakásipti jalǵastyryp, mal sharýashylyǵymen ainalysyp keledi. Otbasynyń ustanymy: «Úlgili otbasy – qoǵam negizi». Diplomant atanǵan otbasyǵa mikroavtobýstyń kilti tabys etildi.
