Qyzylordadaǵy shyny zaýytynyń ainalasynda 8 ilespe zaýyt salynady dep josparlanǵan. Úsh zaýyttyń jobasy belgilenip, biznes qurylymyna qatysty kásipkerler qyzyǵýshylyq bildirip, qujattaryn daiyndady. Bul týraly Qyzylorda oblysynyń ákimi Gúlshara Ábdiqalyqova «Apta» baǵdarlamasyna bergen suhbatynda aitty, dep habarlaidy QazAqparat.
«Qyzylordadaǵy shyny zaýytynyń qurylysy 70% aiaqtaldy. Eki másele ǵana qaldy, olar: balqytý vannasy men kúidirý peshi. Qazirgi ýaqytta mamandarmen kelissózder júrgizip jatyrmyz. Bizdiń tarapymyzdan onyń ainalasyndaǵy infraqurylymyn aiaqtaýǵa, vagondar keletin joldy jóndeýge daiynbyz. Al qalǵan 30% jumysy mamandar kelgen jaǵdaida birtindep bitedi. Bizdiń elimizge jylyna baǵasy 1 mln. dollar bolatyn shyny syrttan keledi eken. Eger ózimizdiń zaýytty iske qosatyn bolsaq, sol 1 mln. dollar bizde qalady. Syrtqa satsaq – taǵy da kiris bolady. Qazirgi ýaqytta biz óte jaqsy máseleni kóterdik. Osy shyny zaýyttyń ainalasynda 8 ilespe zaýyt salamyz dep josparlap otyrmyz. Úsh zaýyttyń jobasy belgilenip, biznes qurylymyna qatysty kásipkerler qyzyǵýshylyq bildirip, qujattaryn daiyndap qoidy. Mysaly, bir zaýyt shynydan ydys jasasa, ekinshi zaýyt aina jasaidy, al úshinshi zaýyt qurylysta kóp paidalanylatyn shyny talshyǵyn shyǵarady. Osy úsh zaýyttyń ózi 15-16 mlrd. teńge investitsiia tartady», - deidi Qyzylorda oblysynyń ákimi Gúlshara Ábdiqalyqova.
Sondai-aq, ol «Shalqiia» ken ornynda qorǵasyn, myrysh óndeitin óndiris orny salynatynyn aitty.
«Shalqiia» ken ornynda da qorǵasyn, myrysh óndeitin óndiris orny salynaiyn dep jatyr. Qazirgi ýaqytta «Samuryq Qazynamen» birge jumys istep jatyrmyz. 8 mlrd. teńgege jýyq investitsiia tartylyp, jumys bastalady. Odan basqa, Aral óńirinde kaltsilendirilgen soda ónditerin zaýytynyń barlyq qujattary daiyn. QR Ekologiia ministrligine shlakty saqtaityn orynǵa qatysty suraqtar bolǵan. Ol máseleni tolyq sheshtik. Kásipkerler jumysty bastaýǵa ázir», - deidi ol.
