Qyzylorda - Qumkól baǵytyndaǵy jolda 35 jolaýshysy bar avtobýs aýdaryldy. Ákimshilik politsiia ókiliniń málimeti boiynsha, jol apatynan segiz adam mert bolyp, jiyrmadan astam adam zardap shekken. Apat bolǵan jol jabyq tur.
Jeltoqsannyń 3-i kúni jergilikti ýaqytpen tańerteńgi saǵat 5.30 shamasynda Qyzylorda oblysyndaǵy Qyzylorda - Qumkól baǵytyndaǵy jol boiynda jolaýshy avtobýsy apatqa ushyraǵan.
Qazaqstan ishki ister ministrliginiń Tótenshe jaǵdailar qyzmetiniń habarlaýynsha, 35 jolaýshy otyrǵan avtobýs Qyzylorda qalasynan shamamen 85 kilometr jerde joldan shyǵyp, aýdarylyp qalǵan.
"Jol apaty saldarynan 7 adam mert bolyp, 22 adam zardap shekti" dep habarlady Qyzylorda oblystyq tótenshe jaǵdai departamenti.
Arada birshama ýaqyt ótkende, IIM Ákimshilik politsiia komiteti bastyǵynyń orynbasary Janat Ábdirahmanov qaza tapqandar sany segiz adamǵa jetkenin habarlady. IIM apatqa ushyraǵan avtobýstyń Shymkenttegi munai kompaniiasyna tiesili ekenin habarlady.
Politsiia ókiliniń aitýynsha, Qyzylorda oblysyndaǵy Qumkól ken ornyna bara jatqan avtobýstyń aýdarylýyna kóktaiǵaq sebep bolǵan.
Seisenbi kúni Qazaqstan ishki ister ministri Erlan Turǵymbaev apat bolǵan jerde jedel tergeý toby, qutqarýshylar men dárigerler jumys istep jatqanyn aitty.
- IIM aýa raiynyń qolaisyzdyǵyna bailanysty Aqtóbe, Qyzylorda men Jambyl oblystarynda kei joldar jabylatyny týraly eskertken. Jaýyn-shashyn bolyp, túnde kún sýytqandyqtan jol betine muz qatqan. Joldar ishinara jabyldy, - dedi ministr.
Avtobýs apatyna bailanysty Qylmystyq kodekstiń 345-baby 2-tarmaǵy ("Jol-kólik erejelerin buzý") boiynsha qylmystyq is qozǵalǵan.
Azattyq portalynyń habarlaýynsha, Qyzylorda - Qumkól baǵytyndaǵy jol jabylǵan. Qyzylorda qalasynan 25 shamqyrymda jol boiyna politsiia qoiylǵan. Jol shetinde turǵan júk kólikteri men jeńil avtomobilder arasynda Qumkól munai kenishine jumysshy tasityn avtobýstar da bar.
Eýropa odaǵy statistika qyzmetiniń dereginshe, Qazaqstan jol apaty kóp bolatyn álemdegi bes eldiń qataryna enedi. Kólik apattarynyń negizgi sebebi retinde jol erejesin saqtamaý jáne jol sapasynyń nasharlyǵy atalady.
Ótken aida Qyzylorda qalasynda jol ústinde soqtyǵysqan eki jeńil kóliktiń biri avtobýs aialdamasynda turǵan adamdardy soqqan. Saldarynan úsh adam sol jerde qaza bolyp, zardap shekken eki adam aýrýhanaǵa jetkizilgen.
Qazannyń 5-i kúni Aqtóbe qalasynan 13 shaqyrym jerde jolda ketip bara jatqan oqýshylar otyrǵan avtobýs pen jeńil kólik soqtyǵysyp, avtobýs bir jaǵyna aýdarylyp ketken. Avtobýsta 18 oqýshy men 9 eresek adam bolǵan. Jol apaty saldarynan eki bala aýrýhanaǵa túsken, taǵy birneshe bala jeńil jaraqat alǵan.
Maýsymnyń 25-i kúni jolaýshylar otyrǵan avtobýs Aqtóbeden shyǵyp, Qyzyljar eldimekeni tusynan óte bergen kezde KamAZ júk kóligimen soqtyǵysyp qaldy. Avtobýstaǵy jolaýshylardyń biri mert bolyp, zardap shekken 12 adam (úsheýi - bala) aýrýhanaǵa túsken.
2018 jyly qańtarda Qazaqstannyń Aqtóbe oblysynda Ózbekstannan shyqqan eńbek migranttary ketip bara jatqan avtobýs órtengen. Avtobýsta otyrǵan 52 adam mert bolǵan. Olardyń barlyǵy – Ózbekstan azamaty. Eki jolaýshy men úsh júrgizýshi aman qalǵan.
