Qyzylordada aqshalai syiaqy úshin bir top adam túlekterge, muǵalimder men mektep basshylaryna ulttyq biryńǵai jáne biliktilik testileýinen sátti ótýge kómektesken, - dep habarlaidy Tengrinews.kz agenttigi Qyzylorda №2 sotynyń baspasóz qyzmetine silteme jasap.
Vedomstvonyń baspasóz qyzmeti ókilderiniń málimetinshe, alty aiyptalýshy aqparattandyrý jáne bailanys salasynda aýyr qylmys jasaǵan.
"S. jáne D. esimdi azamattar aqshalai syiaqy alý maqsatynda zańsyz testileýdi uiymdastyrý úshin "F" JShS-nyń tehnikalyq direktorymen shart jasasty. Kelisimge sáikes, Ulttyq testileý ortalyǵynyń "kompiýterlik testileý" bazasyna zańsyz qashyqtyqtan qosylýdy filial operatory A. júrgizýi kerek edi, ol úshin oǵan syiaqy úlesi ýáde etildi", - dep habarlady sottyń baspasóz qyzmeti ókilderi.
Shemanyń taǵy bir qatysýshysy - IT mamany testilenýshilerdiń kompiýterlerine qashyqtan qol jetkizýdi qamtamasyz etetin arnaiy qurylǵy daiyndap, ony seriktesine bergen.
Osylaisha, A. esimdi operator Ulttyq testileý ortalyǵynyń "kompiýterlik testileý" derekter bazasyna qashyqtan qosylý arqyly 100-den asa testileý kompiýterlerine zańsyz qosylyp, zańsyz ruqsat alyp, testileý kezinde test suraqtaryn kóshirip, durys jaýaptaryn aldy. VNC Viewer jáne AnyDesk qosymshalary arqyly testileýshilerge joǵary upailar jinaldy. Al qylmystyq top tiisti syiaqy alǵan.
"Sottalýshylardyń zańsyz áreketteriniń saldarynan memleketke 27 594 052 teńge kóleminde materialdyq shyǵyn keltirilgen. Alaida sotaldy tergep-tekserý barysynda keltirilgen zalal tolyǵymen óteldi", - dep habarlady Qyzylorda №2 sotynyń baspasóz qyzmeti ókilderi.
Is protsestik kelisimmen sotqa joldandy.
Sot úkimimen sottalýshylar A. jáne K. esimdi adamdar kináli dep tanylyp, olarǵa úsh jyl merzimge bas bostandyǵynan aiyrý jazasy taǵaiyndaldy. Bul is boiynsha basqa aiyptalýshylar da dál osyndai merzimge jazalandy.
"Barlyq sottalýshy Qylmystyq kodekstiń 63-baby 1-bóligine sáikes shartty túrde sottaldy", - delingen habarlamada.
Úkim zańdy kúshine engen joq.
